PrUB1478.09.24

[...] Ouch hatte Niclus unszer szon eynen bothen czu koniglicher geschicket sich kegen seyne konigliche gnade dirbietende also, alse eynem getrauwen undirsossen kegen seynem herrn geboret zuthuende und ouch sich kegen seynen konigl. gnaden yn dissen gescheften wolde also beweisen, das her seyner konigl. maiestat gunst und gnade mochte behalden.

Hot die konigl. maiestat dem ersamen herrn Gabriel van Beyersehe und seynem bothen also geantworthet undir vile worten: Wir haben dem herrn bischoffe vonr Coye geschreben und bevolen mit den herren von landen und steten unsers landes Prewsen von dem czoge und andern sachen und mit rothe des herrn gubernators handel zuhaben; her fuge sich czum herrn bischoffe, der wird enn underrichten, wie her sich halden sal.

Und konigliche maiestat hat bevolen, dem herrn Gabrieli die sache unserm szone czuschreiben. So ist unser szon im willen alse morn fru czuczien czum herrn bischoffe vonr Coye und wil horen von seyner veterlickeit, ab die em icht wirt von den sachen czukennen geben, das die icht begert die herrn rethe von landen und stete yn den sachen czurotes czunemen. Ist es das seyne gnode sich yn den sachen nicht wirt blos geben, so szal unser szon fortreiten czu den herrn von Thorn und czu den herrn des Culmischen landis mit en czureden, nochdem sich die sachen machen und uns also usz allen sachen der wissenschaft der herre bischoff wil stosen, das unns wol deucht geroten, das wir mit enander czu hoffe quemen und ousz sollichen sachen muchten handeln, uff das wir ouch von den sachen mitwusten und der also gantcz nicht unwissende weren, und was euer gudduncken und mehnunge hiruff vor das beste sey, uns das wollet schriftlich mitteylen aus seumen, wenn die konigl. maiestat, alse euch wissendlich ist, hot am neesten seyne bothen alhye bey unns gehat, deme dann eyn iderman noch seynem vermogen hulffe und beystandt czugesaget hat, und der herr bischof vil uns nu also gancz ousz allen sachen vorstosen, das dach ane konigl. maiestat wissen geschit und willen. Und dorumb das von dissem teyle nymandt czeut, gibbet der orden den iren vor, das wir konigl. maiestat keyne hulffe thun wellen, sunder mit den sachen czufriede weszen, durch welch vorgeben sie ire undirsossen alle uffgeredt haben, das mit en czu velde zien [...]