PrUB1452.06.17.a

Ritter, knechte unde stete des landes zcu Prussen itcunt vorsampmelt czur Mewe von unser eynunge wegen.

Her Segenant, ir wisset, wi is czum Elbingen leczczten gelassen wart, alzo von unser eynunge wegen, das di sulde bleiben ansteen geruclich bis zcu Martini¹. Dorczwischen sulden personen sich ken Marienwerder fugen unde di sachen handeln, wi wir mit unsern hern czu ruhe unde czu frede qwemen.

Och wisset ir wol, wi in zcu Mittevaste² mit den euwern von landen und steten gescheiden seyt zcu Marienwerder, unde haben gehorcht, ap deme genug geschege, ab das geschen ist, das wisset ir wol. Och vornemen wir, das ir geritten mit etlichen andern hot in die gebiete, alze Osterode und Elbingen und geerbetet hot widder unser eynunge, domethe ir lewte von uns geczogen habt, di uns er truwe unde ere mit hant und mit vorsatcz^a der segel wir an unserm brife haben. Hirumme vormanen wir euch und andere, ab ir euwer truwe und ere genug gethon habt. Och vornemen wir, das Tranckwicz gesprochen hot, das wir in mit logen unde trogen und mit schalkeit in die eynunge brocht hetten, das wir alle vorantwerten wellen mit handen und munden, alzo gutte lewte.

Gegeben czur Mewe am Sonobend post Viti et Modesti im 52^ten jare under here Jones von der Jhene des segels iczunt wir all gebruchen.