PrUB1452.05.20

Bereydicheyt fruntlikes denstes^a myt vormoghen alles ghuden tovorn.

Grotmechtighe here, ghunstighe ghude ghunner!

Uth juwer herlicheyt breve by bryngher van dessen hebbe wij clarliken vornomen, dat gij unse warnynghes unde waschuwes breve alse van der Enghelschen weghen hebben entfanghen unde vurder in dem vorscreven breve beroren van den vo^erwo^erden unde der eendracht, de wij myt juwen sendeboden int jar neghenundeveertich neghestvorghanghen hijr bynnen unser stad makeden, so dat juwe herlicheyt juwe lande unde stede unde wij alse van der Enghelschen weghen wolden wesen unghescheeden. Dar na unde en boven doch gij etlike sendeboden des vorscreven heren koninghes, so juwe herlicheyt sulven scrivet myt twen schepen unde enem nemeliken antael personen een ja^er lank in juwe lande leydeden ane unsen weten unde willen, de doch ghunstighe leve here nicht alse sendeboden, men alse mechtighe rijke cooplude coopmanswijs dorch de zee na juwen lande wart synt ghebaren. Id is ok wol waer, dat gy uns van der tokunpft der erbenemeden sendeboden screven, uppe dat wij de unse uppe de tijd ok int land mochten senden, deme wij also nicht doen konden, wente wij und meer stede alse van der Enghelschen weghen eenes anderen daghes bynnen Bremen to holden hadden vorramet. Vurder ghunstighe leve here alse juwe gro^etmechtighe werdicheyt in dem erbenomeden breve vurder beroret, dat gij mit den juwen hebben ghehandelt unde willen unse warschuwynghe den juwen in juwen steden laten vorkundighen over al. Myt sulkem underscheede bestellen, dat nymant van den juwen jenigherleye selschopp edde schepespart myt den Enghelschen schal hebben edder Enghelsch ghud myt enem losen godespennynghe kopen edder hanteren, biddende darumme myt allem flijte, dat wij myt den unsen, de wij also in de zee schickende werden, willen schaffen, bestellen und myt eernste de dynghe also vo^eghen, dat de juwen an eren schepen, personen unde ghuderen nicht werden gheto^evet, beschedighet und ghehalden, sunder dat se dorch de zee, wo^erhen se willen, van den unsen unghehyndert ere vorkerynghe und nerynghe vrij doen und ou^een und dat wij den juwen dar to behulplik und vorderlik willen wesen etc. Ghunstighe leve herre, wij weten myt juwer herlicheyt und den juwen anders nicht wen vruntschupp, ghunst und leve. Unde wolden de juwen ok ungherne wo^erane hynderen, to^even edder letten, dat wij ok unsen hovetlu^eden tor zeeward medeghedaen und myt ernste in beveel hebben ghegheven,so dat se an den unschuldighen coopman neene overvarynghe doen scholen, men ene vorderen, beschermen^b und beschutten, wo^er se konen unde moghen, wolden over de juwen westward vorkeren unde myt den Enghelschen unsen openbaren unde entzechten vyenden handelighe, vormenghynghe edder schepynghe unde koopenschupp dryven see yeghen uns to sterkende unde dar over de juwen qwemen to stote unde in schaden, des wille wij uns vorwaret weten. Unde to sodannem schaden nicht willen antworden, so dat in unses vorscreven warschuwes breven uterliken unde klaerliken is vorwaret. Gode dem Heren wij juwe gro^etmechtighen werdicheyt bevelen to langhen tijden sund unde wolmoghende.

Screven under unser stad jngheseghel am sonnavende na unses Heren Godes Hemmelva^ert daghe, anno etc. 52^o.

Consules Lubicenses.