PrUB1413.09.17.b

Also hat der kompthur von Thorun geschr[eben] mit unsers homeisters rathe und der andern gebietiger ken Polan Jacobo de Conneczpole, Syvod, Mattis de Labeschaw, Sbigneus regni Polonie marschalco.

Unsern fruntlichen grus czuvor. Edlen besundern lieben hern.

Euwern briff uns gesand han wir wol vornomen, und ist uns wol wissentlichen, das wir mit etlichen andern von geheis unsers homeisters und sines rathes czu Junge Lesselaw woren, do wir an euwern hern worbin, das her einen tag mit unserm homeister umbe alle schelunge, die ober den fredebriff czu Thorun gemacht czwisschen beiden her[re]n und iren landen, weren entstanden, an eyner bequemen stad uff Pfingisten oder Sinte Michaelis tag welden halden, und do kos euwer here uff Sinte Michaelis tag und slos etliche artikel aus, do die meiste schelunge an hing. Das wir weder an unsern homeister brochten, der im dornoch weder umbe schreib, welde her umbe schelunge, als vorberurt ist, uff Michaelis eynen tag suchen, des welde unser homeister gevolgig seyn.

Also das das mit briffen vor wars werde, das eyn part^a) wedir das ander dor czwisschen nichtis enerbeit oder tet, und das das mit briffen von beiden herren bevestet werde, als des eyn notdurfft wer. Als ouch der here koning schreib unserm homeister czuthunde und eynen tag sulches briffes czu entphaende im saczte, uff welichen tag unser homeister seyn erbar treffliche botschafft mit foller macht sulche briffe czu entfoende und wedir umbe czu geben sand. Do de dar quamen, do funden sie nymandes von des hern konigis wegen wen her Johan Pelle myt eynem gebrochlichem brieffe, do die meiste schelunge aus und nicht in beslossen was, und ouch nymandes von des hern konigis wegen was, die macht hetten mit unsers homeisters rethen, eynen briff, do beide herren und ir land in vorwart vuren czumachen. Dorumme der selbe tag von euwer gebrechlichkeit halben und nicht von unsers homeisters wegen uff den selbin tag abegink.

Ge[geben] czu Marienburg am nehesten Sontage noch Exaltationis Crucis.