PrUB1413.06.22.b

Also ist geschr[eben] den steten Stolppe, Slauwe und Ruwenwalde.

Ir burgermeistere und rathman[ne] der stete Stolppe, Slauwe und Ruwenwalde, ir wisset wol, wie^a) ir uch ken uns und unserm Orden habt vorschreben, vor uwren herrn herczogen zur Stolppe von des gelegen geldes wegen. Und wie wol wir uch ufte dorumbe haben lossen manen und dorczu die tage der beczalunge sind vorgangen, so habt ir uns bis do her^b) do von keyne usrichtunge gethon, noch gedocht czubeczalen.

Des so mane wir uch noch uwris briffis usweisunge bey uwren truwen und eren, das ir den selben genug thut und inreytet in unser stad Danczke, also das ir do siet des achtentages nach Johannis Baptiste nu nehest czu kommende¹⁾ und von dannen nicht enscheidet, ir en sey denne mit unserme willen und das ir uns bezalet noch usweisunge uwris briffis. Und wurdet ir, des wir nicht huffen uwir truwe und ere sin undechtig und nicht inreyten noch uns beczahlen, so musten wir forder doruff gedencken, wie wir uch vor herren, forsten, rittern und knechten, steten und wo is uns czuthunde were mit vorkundigunge uwris briffis czurede wurden setczen und dorczu so vil tun, als uns fuget.

Geg[eben] zu Danczke an des Hilgenlichnams tage anno etc. XIIIo.