PrUB1413.06.13

Dessen briff gap man dem foythe der Nuwe Marke mete an die manschaft, ritter und k[nappen] stete^a) etc.

Wir bruder Heinrich von Plawen homeister Dutsches Ordens enpiten unsern liben getruwen, der manneschaft, rittern und knechten, steten und gemeynlich allen inwonern der Nuwen Marke unsern fruntlichen grus mit merunge alles gutes.

Liben getruwen, wir begern euch czu wissen, das wir mit rate unser gebiteger den ersamen geistlichen man unsers ordens Czandir Machewitz, desem kegenwertigen bewiser, gemachet czu eyme foythe der Nuwen Marke, den wir euch an unser stad czu eyme herren senden. Und hoffen, das her mit der hulfe Gotis sich alzo werde bewysen, das her wol eyne wile wirt bie euch bliben.

Bittende mit ganczem flyße das ir yn gutlichen ufnemen und ym gehorsam siet und willig, als wir euch des gancz czu getruwen. Und was uns^b) mit sampt der Nuwen Marke wirt anfechten, bitten wir euch czu sulchir beschirmunge im getruwlichen czu helffen. Und bewyset euch, liben getruwen, alzo kegen im, das wir^c) euwir truwe und libe, die ir uns und unserm orden siet verpflichtet, irkennen mogen. Dorane thut ir uns sunderlichen czu danke, went wir genczlich hoffen, her sulle euch wol beqweme und nuczcze werden und alzo by euch thun, das ir im werdet danken.

Geg[eben] czu Mar[ienburg] am Dinstage czu Pfingesten im xiiii^c und xiii[ten] jare.