Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1161-Consilium 14
Frater Baptista de Ursinis magister
xiiii. De officialibus civitatis Rhodi iusticie deputati
Non est, quod magis reipubilice et populorum statui conducat quam iusticie limites non preterire et unicuique ius suum reddere. Eapropter precipimus et mandamus castellano, baiulivo commercii Rhodi, iudicibus appellationum et ordinariis ac ceteris officialibus dicte civitatis, ut omni studio et animi solertia intendant subditis et populo nostro iusticiam ministrare et unicuique ius suum prebere, ne vi, dolo, fraude, spe, timore, precio, amore, odio aut alia machinatione compulsi [63v] ab equitatis tramite devient, sed recte, sancte, iuste leges, canones, statuta et consuetudines observantes sententias proferant et iusticiam ministrent, equa quoque humanitate, caritate et iusticia divites, egenos, pupillos, mediocres et supremos tractent. Nam si legittimis probationibus, testibus directe vel indirecte nostrum populum minis, dolis aut precio aut alias molestatum, inequitatum(a) et ab aliquo ipsorum oppressum cognoverimus, delinquentes tam graves tamquam manifestas correctiones et poenas luent, quod ceteris in exemplum cedet; perpetuoque reddentur, si contrafecerint, ad (b)officia regenda(b) inhabiles.
(b) Venice 1495, Ulm 1496; Ms.: offam regendam; Salamanca 1534: offensa regenda.
Next Consilium 15 | Back to the Contents