Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1076-Hospitalitas 1
Consuetudo
i. Quod fratres hospitalitatem exerceant
[42v] Post cultum divinum nihil est, quod magis menti nostre insitum sit quam pro laudabili et inveterata consuetudine hospitalitatem exercere, observare, perficere, in qua queque misericordie opera certe complentur, et dominus noster Iesus Christus pauperibus reficitur, honoratur, colitur. Quam nostri maiores et institutores summa mente venerantes ab hac nomen sumpserunt et nobis indiderunt, fortissimique Iude Machabei, qui pro unius veri dei cultu constanter pugnavit et hospitalitatem devote exercuit ac Ioannis(a) Hircani devotissimi et prudentissimi, qui ex thesauris a David sepulchro depromptis(b) civitatem sanctam obsidione liberavit et xenodochium erexit, mores imitati et servantes pro Christo arma et sanctam hospitalitatem exercere xenodochiaque erigere statuerunt. Ideo circa hanc complendam et omni studio servandam fratres nostri diligentes sint et servent que a nostris predecessoribus sancita sunt ac dedicata, ne abducantur ab exordii nostri fonte(c), verum ipsum primordium servemus, veneremur, quod ordinem nostrum ad hunc statum erexit.
Inter quoque ordinis nostri xenodochia per universum orbem constituta ac elemosinas, que ab eo peraguntur, indubitata mente honoretur Rhodium xenodochium edificiis et palacio etate nostra ornatum, ampliatum, conditum, in quo egroti cuiusvis generis et nationis fuerint, recipiuntur, curantur, refocillantur, expensis erarii nostri aluntur et egrotationum medicamina recipiunt(d); semper quoque pro religionis facultatibus amplietur; supellectilique ornetur et munusculis splendeat. In eo namque Christus habitat; in eoque colitur; in eoque reficitur.
Assidua quoque illa elemosyna, que in palatio magistrali de respiciendis tredecim pauperibus singulis fit diebus, servetur; ac cetere elemosyne, que in palatiis octo nationum fiunt, non cessent. Orneturque illa coena, que quotannis quinta feria passionis Christi in palatio magistrali celebratur, in qua magister et baiulivi Christum imitantes pauperum tredecim pedes lavant eosque opipere pascunt et muneribus donant. Celebretur pariformiter annua coena, que in eo xenodochio parari consuevit, in(e) qua pauperes tredecim Christi et apostolorum numerum referentes aluntur, et donis prosequitur hospitale, quatenus devotissimis operibus his functi deo grati reddamur et ab hostium tyrannide servemur defendamurque.
(b) Venice 1495, Ulm 1496, Salamanca 1534; Ms. deprumtis.
(c) Venice 1495, Ulm 1496, Salamanca 1534; Ms. funte.
(d) Venice 1495, Ulm 1496, Salamanca 1534; Ms. recipiuntur.
(e) Missing.
Next Hospitalitas 2 | Back to the Contents