Stabilimenta Rhodiorum militum - Latin version

1028-Receptio 18

   Frater Iacobus de Milly magister.
xviii. Quam poenam incurrunt, qui in fratrem militem aliquem contra formam stabilimentorum recipiunt.

Decet religiosos stabilimentis parere, et qui contrafecerint animadversione profecto digni censentur. Itaque laudabiliter sancitum est, quod, si priores vel castellanus Emposte in fratrem militem aliquem receperint, qui gentilhomo nomine et armis et legitimo matrimonio procreatus ac idoneus secundum formam stabilimentorum non existat, eo ipso una camera priorali^(a) privati sint, preceptor vero, qui contrafecerit, pręceptoria privetur. Que camera vel preceptoria collationi lingue, cuius erit delinquens, pertineat. Si vero contrafaciens conventualis fuerit, numquam cabimentum adipisci possit, sed eo in perpetuum privetur. Fratres vero, qui testimonium de idoneitate dederint, si postmodum oppositum comperiatur, si testes priores, castellanus Empostę vel preceptores sint, cameram [30r] vel preceptoriam perdant. Si vero conventuales existant, inhabiles ad consequenda officia, beneficia et soldeam habendam in perpetuum reddantur, et periurii notam poenamque incurrant. Preiudicium tamen illi, qui in vim huius testimonii aliquem in fratrem militem admiserit, generari non possit, quinimmo culpa immunis diiudicetur. Insuper priores, castellanus Empostę, preceptores et fratres, qui sub una et eadem licentia plures quam in eadem continentur milites vel armorum servientes admiserint, vel qui fratres, cuiuscunque gradus fuerint, pręter et contra seriem stabilimentorum in nostro ordine receperint, in similes poenas incidant exceptis casibus, in quibus stabilimenta expresse poenam contrafacientibus declarant infligendam.