Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
220-Baillifz 18
[k3v]
Frère Jehan de Lastic maistre
xviii. Du commandeur et des preudommes du grenier et de la prééminence du grant commandeur esdites choses
On doit faire grant diligence à la conservacion et garde des vivres et grains affin que par négligence ne soient perduz et mal distribuez, car en ce consiste nostre estat. Et pourtant, désirans éviter les dommaiges, nous establissons que tous les fromens, orges, grains, biscuitz et autres vivres appartenans au trésor soyent mis es greniers et lieux seurs et ydoines et gardez et fermez de deux clefz. Et soit esleu ung religieux de bonne vie et discrecion expérimentée commandeur du grenier qui tiendra l’une desdites clefz. Et par le maistre et conseil ordinaire soient esleuz deux religieux ydoines et ad ce suffisans de diverses langues qui doivent garder l’autre clef. Et lesditz preudommes doient user de leur office par le terme de troys moys et doient entendre à la conservacion et distribucion du froment des vivres et tiengnent compte des choses récevez et distribueez comme par les cédules du grant commandeur sera ordonné. Et soient tenu donner ledit compte de trois moys au maistre et conseil. Et se en la distribucion desdites choses augment ou diminucion se trouvera que ce soit au prouffit et dommaige dudit trésor. Adjoingnant que les greniers et magasins où seront recluses lesdites choses soient bullées de la bulle du grant commandeur. Toutesfoiz, les dessusdites [k4r] ayent ung magasin franc et ouvert où puissent faire les continuelles distribucions. Et les commandeurs de la volte et du grenier aient chascun les gaiges de xxv florins tant seulement oultre la table et soldée que prennent du trésor.
Next Baillifz 19 | Back to the Contents