Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
161-Conseil 14
[h7r]
Frere Baptiste des Ursins maistre
xiiii. Des officiers deputez à la justice de la cité de Rhodes
Il n’est chose qui soit plus conveniente à l’estat des seigneuries et peuple que donner le droit à ung chascun et non preterir les limittes de justice. Pourtant nous commandons au chastellain, bailly du commerch de Rhodes, juges d’appellation et ordinaire et aultres officiers de la cité que avec toute diligence et prudence doyent administrer justice aux subgjectz et à nostre peuple et donner le droit à ung chascun ; et que ne doyent devyer des limittes d’equité constraints de force, de dol, de fraulde, d’esperance, de crainte, de dons, d’amour, de hayne ou aultre ingenieuse cause, mais droicturierement, saintement et justement selon les loix, decretale, statuz et coustumes doyent proferir leurs sentences et administrer justice ; et par humanité, charité et justice esgalement traictent les riches, les pauvres, les pupilz, les moyens et les superieurs, car se congnoisserons par legittimes preuves et tesmoings que directement ou indirectement nostre peuple d’aulcun d’iceulx soit oppressé, inquieté ou molesté par grâce, dol ou dons les delinquans recevront tant graves corrections et peines que sera exemple des aultres. Et se contreferont seront perpetuellement inhabiles à regir offices.
Next Conseil 15 | Back to the Contents