Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
072-Eglise 39
[f1r]
Frere Pierre d’Aubusson cardinal et maistre
xxxix. La fondation de l’esglise de Saincte-Marie-de-Victoire
Quant soit grief, damnable et horrible le vice d’ingratitude ne se peult asses explicquer et dire. Non seulement les sainctes escriptures, mais aussi les histoires prophane et gentiles la ingratitude comme détestable et mauldicte desprisent et abhorrisent. Et se vers ung homme, nostre bienfacteur, devons estre recongnoissans par gratitude moult plus incomparablement devons manifester et demonstrer les signes de gratitude envers Dieu, nostre créateur, du quel tous biens et toute victoire dérive et descend. Et se pour les continuelz bénéfices et grâces receuez de la divine magesté et infinie bonté soumes tenuz de le louer, certainement au temps présent le devons habundanment regracier consideré le grant bénéfice qu’avons receu de sa clémence(a) que les Turcqs, ennemys de Crist et de la saincte foy catholique, assiégeans la cité de Rhodes et icelles avecques trèsimpétueuses bombardes et cruelles armes oppugnans le xxvii. jour de juillet Mcccclxxx ; ou quel jour l’esglise latine fait la feste des sept dormans et l’esglise grecque célèbre la feste de saint Panthaleon impétueusement monterent la muraille de Rhodes et cruellement combatirent dont furent par l’aide divin reboutez, tuez et vaincuz par ceulx de Rhodes ournez de la saincte croix en quoy nostre religion a obtenu glorieuse victoire resplendissant de miracles comme l’istoire sur ce compliée diffusement déclare. Et pourtant à recordance perpétuelle ceste(b) mirculeuse victoire, en louange de Dieu tout puiscant, de nostre saulveur Jhesucrist pour lequel fut combatu, et de la glorieuse Vierge Marie, et de saint Jehan Baptiste [f1v] nostre patron, et de tous les saints instituons, commandons et ordonnons érigir, fonder et doter une chappelle et oratoire soubz le nom de Saincte-Marie-de-Victoire et aussi selon la coustume grecque ung aultre oratoire soubz tiltre de Saint-Panthaleon. La quelle esglise sera assise près de la muraille des juifz où félicement fut comabtu. Esquelles soient solennitez chascun an en mémoire dicelle victoire par les latins et les Grecs(c) célébrées. Et ausdites esglises et oratoires chascun an le xxvii. jour de juillet qui lumière a(d) donné à ceulx de Rhodes l’an adonques revolu la procession dévotement ornée et illustrée doye aller faisans grâces à Dieu et à ses saints et humblement supplians que par sa divine clémence deffende la cité de Rhodes de la servitude et tirannie des infidelz. Et ceulx de Rhodes dévotement s’efforcent avoir les plainières indulgences que nostre Saint-Père le pape Innocent, VIII. de ce nom, à concédez aux visitans ledit jour lesdites oratoires.
(b) seste.
(c) It follows soyent.
(d) missing.