Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
056-Eglise 23
[e5v]
Frère Philbert de Nailhac maistre
xxiii. De l’ornement, restauration et substentation des églises de l’ospital
Honnestete et observance de religion requiert que les esglises et chappelles esquelles est fait le service divin soient aornées et pourveues des choses nécessaires à louenge de Dieu et de la foy. Et pourtant par meure délibération establissons que baillifz, prieurs, chastellain d’Emposte, baillifz par chappitre, commandeurs et frères qui tiennent gouvernement de commanderies et maisons(a) de nostre religion doyent refaire, réparer et maintenir en deu et honneste estat les églises et oratoires et icelles garnir et orner de livres ecclésiasticques, vestemens, calices et aultre utensilles députez au divin service selon la qualité et condition des rentes dicelles commanderies et maisons ; et aussi au service desditez églises et oratoires doyent députer et eslire frères chappellains de honneste vie ; et se ne se trouveront frères chappellains de nostre ordre que adonques doient prendre aultres chappellains honnestes, tant séculiers comme réguliers, que porront avoir jusques à tant que puissent trouver frères chappellains lesquelz dévotement doyent entendre et vacquer au service divin. Sur l’exequution desquelles choses les prieurs et chastellain d’Emposte doyent assignir temps competent(b) aux commandeurs et frères. Ou quel temps s’ilz refuseront faire les contrefaisans soient privez des rentes des commanderies jusques à tant que les choses sudictes soient diligemment complyes. Toutesfois sur lesditz rentes leur soit reservé estroit vestiaire et vivre. Et se les prieurs et chastellain d’Emposte sur lesdictes choses ne feront diligente provision, en iceluy cas le [e6r] doyent exequir et faire à leurs propres despens, car à leur office appartient sur les choses avoir diligente vigilance.
(a) competent.