Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
029-Reception 19
[d5r]
Frère Pierre d’Aubusson cardinal et maistre
xix. Que en la réception des frères chevaliers nul ne preigne sur soy que celuy qui se doibt recepuoir est gentil homme
À obvier aux cautelles et dolz que pevent entrevenir en la réception des frères chevaliers pource que aulcuns de noz frèrez présument sur leur honneur prendre que ceulx qui doibvent estre receuz en nostre ordre sont gentilz hommes et telz que les establissemens requierent, desquelz jamais ou peu de foiz n’en appert aulcune examination, mais la chose demeure en négligence, et pourtant pour obvier à ceste fraude establissons que nul frère de nostre ordre, de quelque degré que soit, ne preigne sur soy ne ad ce soit admis que ceulx qui doibvent estre receuz sont gentilz hommes et telz que les establissemens requierent. Mais ceulx qui doibvent estre receuz doyent prouver suffisamment et legittemement que sont gentilz hommes et telz que les establissemens ordonnent. Laquelle chose prouvée soyent receuz. Neantmoins toutes et quantes foys aulcun frère vouldra opposer contre telz estre aultres que n’ont prouvé adoncques soit admis à ce prouver, avec ce que le doye faire en terme de sept ans du jour de la réception, lequel passé plus ne soit admis ad ce improuver.
Next Reception 20 | Back to the Contents