PrUB, JS 387

{Überlieferung}
B = OF 2c, p. 52  [olim Registrant des Hochmeisters Konrad von Jungingen, Nro. II, fol. 24v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 18-19.

{Diplomatische Erörterung des Stücks}
Gleichzeitige Abschrift, Papier.

Irluchter furste und libir here.
Das wir ewir landt ymands voreigen wellen, ist uns ny gewest czu mute. Ouch hette wir is nicht czu thun, sundir das is fry by ewir herlichkeit blebe, der orden tut czu der cziet dorczu sin vormogen. Und sint dem mole, das is uns und dem orden stunt in kowffe, so was is not und ist not, das wir nicht alleine gelowbeten und wenten, sunder das wir wusten dy wise ewir fryheit. Und umb des so sy wir me denne eyn gancz iar begert gewest eyner usschrift ewirs houbtbrives obir das landt Dobryn, dy uns von euch ny mochte czu sehn werden. Sunder eyne usschrift sante wir euch, us der wir czogen eczwas eigenschaft, und ab dy nicht ist noch dem lute ewirs rechten houptbrives, so begere wir sy noch hutes tages czu sehn.
Ouch wisset libir here, das wir und unser ordin allecziet haben gehalden unsir brive unvorczoglich, dy wir pflichtig woren czu halden, und wellen sy {S. 19} halden, und dy sende brive und register, dor an ir euch cziet, worden gegebin off ewer wort, czum ersten wen ewer gnad dicke vorschreib und sprach, ir wellet is fry vorkowffen dem ordin. Sunder dornoch dy usschrift uns czu handen qwam, do worde wir widerstosig, wir segen denne sotane brive, das wir sicher weren einer volmechtigen fryheit. Ewern gnaden wir ofte dornoch entpoten und geschriben haben, das ir uns gerucht czu senden dy bewysunge ewer fryheit. Das mochte uns noch ny geschen, umb das siet ir in der sache und nicht wir, und wir sint allecziet gereit gewest czu halden den kowff, hette wir dirkant eyne ufrichtige undirwysunge ewir fryheit. Und haben ewer gnaden ny kein unmoglichs angemutet, noch kein unbillichs, moglich und billich ist is noch allem rechte czu stellen und czu sagin dy wirde und fryheit des kowfs, nemlich obir furstenliche guter, obir alls so ist das landt ewir, wen ir is geloset noch ewir brive uswisunge. Und als ir schribet von widergebunge der czinse, libir here, ir wist wol ewir vorbrifunge und wer is bewart in vorworten und schriften, wir getruweten wol das ir must dem ordin czu dem czinse hulfe thun, wen durch ewern willen und das man das landt moge behalden vor ewern widersachen, mus man desto me bruder do haben und groser czerunge tragen, dy ir noch rechte. als wir gloyben mustet usrichten,
Dorumb so bedenket, gnediger here, das beqwemste und laset uns ungemanet, als manchveldiclich, went wir is ny haben vorscholt, das got weis, werde wir undirwyset und undirrichtet ewir fryheit mit ewerm houptbrive, also das wir dirkennen mogen, das ir uns das landt fry mogt vorkowffen und geweren, geste wir denne nicht dem kowfe, so mogt ir haben wider uns sache und sost keyne.
Gebin uff unserm huse Marienburg am Fritage noch Katerine virginis [1395].