PrUB, JS 331

{Überlieferung}
B = OF 2c, p. 196 [olim Registrant des Hochmeisters Konrad von Jungingen, Nro. II, fol. 94dv].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 84.

{Diplomatische Erörterung des Stücks}
Gleichzeitige Abschrift, Papier.

Irluchter furste und lieber herre.
Als wir euwir herlichkeit vormols geschriben habin, wie daz unser getruwer Johan Crukman burger von Danczk uns geclaget hette, daz her eyn schiff geschiffet hatte von Campen, der schiffherre genand waz Seyne von Nomen, do in her alzo gut als 500 nobiln geschiffet hatte, daz selbe schiff und gut is komen in die hirlichkeit des herren von der Vere. Und der selbe herre von der Vere und die sienen habin sich des Schiffes und gutes underwunden und vorkowft, und ee das geschach, quam der man, deme das gut gehorte, und hette gerne sien gut weder gehat. Do wolde man im nichtis do von weder geben, das uns dunket wider Got und recht sien.
Hirumb, liber herre, bitte wir euwir herlichkeit begerlich mit allem flize, das euwir herlichkeit den herren von der Vere und siene helfere, die sich des gutes underwunden habin, underwisen und dorczu halden wellet, das den unsern das ire widder werde, dorczu sie recht habin, als euwir herlichkeit welde, ob eyne semeliche sache den euwern in unserem lande geschen were, bie den euwern teten, und bitten euwir herlichkeit, daz ir uns eyn antwert mit desem kegenwertigen boten widder schribet.
Gegeben czu Marienburg uff unserem huse am Donrstag noch Epyfanie domini im XCIX jare.