PrUB, JS 328

{Überlieferung}
B = OF 2c, p. 201 [olim Registrant des Hochmeisters Konrad von Jungingen, Nro. II, fol. 94gr].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 87.

{Diplomatische Erörterung des Stücks}
Gleichzeitige Abschrift, Papier.

Demutige bevelunge und willigen dinst czu aller behegelichkeit bevor.
Allerdurchluchster forste, grosmechtiger gnediger herre, euwern brief mir gesant von wegen des hochgebornen Ladislawen herczogen von Opul, in deme mich euwir allirdurchluchtikeit mit ernstlichim vlyze dirmanet eyner summe geldes von des landes wegen Dobryn, dy ich im scholdig sien solde von koufes wegen etc., wisse euwir grosmechtikeit, gnediger herre, das ich im keynes kowfes gestee noch im pflichtig byn keynerley gelt czu beczalen. Sunder das vorgeschriben landt Dobryn mir hat vorsatczt und mynem orden umb eyne genante suma geldes noch uswisunge syner briefe, dy her gancz und gar dirhabin hat.
Worumb, allirgnedigster herre, bitte ich euwir durchluchtikeit mit allem flicze, das ir im lasset undersagen, das her mich und mynen orden umbedasset lasse kegen euwir durchluchtige grosmecktikeit, kegen andern forsten und mynen herren, wen ich im nichtisnicht schuldig byn. Wendt ich czu euwer grosmechtigen durchluchtikeit gnaden wol genczlich hoffe, das sy nicht vorhenge umb semeliche unmogeliche czusproche, das myns ordens luthe an eren geschefften in euwern landen werden gehindert und offgehaltden, umb das ich mit allem mynen orden flisiclich bitten wil umb seliclickeit euwir und euwir ryche.
Gegeben czu Marienburg am abunde vor Philippi und Jacobi im XCIX jare.