PrUB, JS 325

{Überlieferung}
B = OF 2c, p. 213 [olim Registrant des Hochmeisters Konrad von Jungingen, Nro. II, fol. 96r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 89-90.

{Diplomatische Erörterung des Stücks}
Gleichzeitige Abschrift, Papier.

Irluchter Furste grosmechtiger gnediger herre.
Als euwer grosmechtikeit uns schribende in euwer durchluchtikeit brieffe ru^eret vom tode der allerdurchluchten seligs gedechtnuss frauwen konigynne von Polan haben wir wol vornomen. Grosmechtiger gnediger herre, so ist es ouch von der schickunge und willen Gotes unsers herren also dirgangen, das sie von deser werlde vorscheiden ist. Aber als euwer durchluchtikeit in dem selben euwer hochwirdikeit brieffe ru^eret von krankheit Jagels, der sich eynen konig nennet czu Polan, und ouch wie es vaste vorirret sey im lande czu Polan, geruche grosmechtiger gnediger herre euwir durchluchtikeit czu wissen, das von der selben crankheit und ouch von der vorirrunge im ryche czu Polan bis her keyne worhaftige redliche mere an uns komen ist, die wir czemelich euwer grosmecht[ikeit] hetten mogen schriben. Sunder alleyne vorirrunge im riche, die wir vornemen, under geringen luthen ist, do man sich wenig umb bekummert.
Grosmechtiger gnediger herre, hetten wir bis her eyngerleie nemliche worhaftige mere mo^egen dirfaren us dem riche czu Polan die wir euwer durchlucht[ikeit] hetten mocht schriben czu notcze und fromen. Gnediger herre, das hette wir mitnichte gelassen, und ap wir ouch czukumfteclich eynerley semlicher mere, als euwer grosmecht[ikeit] begert, worhafticlich schriben und euwer herlikeit dorynne rathes pflegen mogen. Do welle wir uns, gnediger herre, gerne allczit also getrulich inne dirczeigen, das euwer grosmecht[ikeit] dirkennen moge, das wir euwer hochwirdikeit gerne czu dinste und czu willen sein wellen in allen sachen die wir vormo^egen.
Geben czur Swecze noch Francisci (1399).