PrUB, JS 301

1401 Mai 17. Marienburg.

Unsern vruntlichen grus czu vor.

Lieber her gebiteger, wir thuen euch czu wissen, wie das Wytowt anders Allexander, herczoge zu Littouwen und Russen, den ewigen frede vorschreben und gemacht mit synen landen uff eyne, unser und unsers ordens lande uff die ander syte alleyne wir doch czu der czeit uns besorgeten syner unstetikeit und forchten synes vorretnuss umb der mancherley clage von syner und syner lande wegen Littouwen und Russen, die do geschach beide in dem hove zu Rome und uswendig vor vil fursten und herren, nemlich vor dem heilgen Riche, clagende ober uns, wir welden keynen frede halden mit den nuwen cristen synes landes. Umb semliche clage wir sere worden vordocht von etlichen fursten und herren, als wir vornomen. Den selbigen frede, also gemacht umb merunge und zunemunge des heilgen cristenthumes, der selbige Wytowt nicht gehalden hat. Sunder an alle unser schult her noch syner alden bo ^esen wiesen newlich in der vaste nehst gewest begangen hat eyne nuwe vorretnusse, in dem her unserm Orden czwu nuwe vesten hat lassen vorbo ^ernen. Dorczu die lande Samaiten, dem orden ewiclich czu geeignet mit allem nutcze und herschaft, sich underwunden hat, bruder und des ordens lute gefangen hat und hutes tages heldet, als ir werdet sehen in den II notteln, die wir euch hirynne senden vorslossen. Die notteln synt begriffen mit korczen worten us mancherley botschaft hin und her gescheen, us der ir doch wol mogt underrichten das begynn und die sache synes vorretnuss, unsere gnedigen herren des heilgen riches, dorczu ritter und knechte, also geschen und anders nicht.
Dorczu sende wir euch artikel us der selben nottel gemacht czu dermanen euwer gedechtnuss vor fursten und herren, wo ir uns {S. 112} entschuldigen sullet und den egenanten Wytowt umb syn vorretnuss beschuldigen. Worumb wir bitten mit allem fleisse, das ir des ordens sache czu euch nemet getruwlichen, und sie czu vorentwerten, wo sichs gebo ^ert, dorczu Wytowts vorretnuss lasset ku ^endigen, wo ir moget in unser gnedigen herren ho ^eve. Wendt wir nicht lyden mogen me synes vorretnusses, sunder dorczu thun wellen mit der hulfe Gotes und allen unsern gnedigen herren des heilgen ryches, bis also lange die heilge cristenheit bas werde vorsichert, doran thut ir uns eyne sunderliche beheglikeit.

Gegeben czu Marienburg am Dinstag vor Pfingsten im MCCCC primo.