PrUB, JS 280

{Überlieferung}
B = OF 3, p. 89-90 [olim Registrant des Hochmeisters Konrad von Jungingen, Nro. 1b, fol. 42].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 138-40.

{Diplomatische Erörterung des Stücks}
Gleichzeitige Abschrift, Papier.

Voluntario servicio cum humili recommendacione premissis ad omnia celsitudinis vestre regie beneplacita pariter et mandata.
Serenissime princeps et domine graciosissime, {S. 139} scire dignetur s[erenitas] v[estra], quod intellecta gracie vestre regia littera nobis nuper scripta, pro parte hominum subditorum celsitudinis vestre honorabilium de Lenne, in causa, quo inter eosdem et procuratorem castri nostri Marienburg vertitur, presertim de et super arrestacione, prout iidem de Lenne certorum bonorum in valore mille et trecentorum nobilium per eundem procuratorem hic in terra nostra facta etc. Eapropter, serenissime princeps et domine magnifice graciose, ad eiusdem celsitudinis vestre noticiam desiderio cupimus pervenire, quod in presencia honorabilis viri portitoris litterarum gracie serenitatis vestre presencium ostensoris procurator supradictus a nobis in hac causa iuxta tenorum litterarum celsitudinis vestre per nos requisitus primo respondebat, quod non ultra summam noningentorum nobilium arrestasset. Et subiunxit, quod honorabiles de Lenna in quadringentis nobilibus superfluis erronee coram magnificencie vestre gracia exposuerunt, produxit eciam ibidem cartas litteras testimoniales serenissimi principis domini regis Scocie et aliorum dominorum nobilium sigillis veris sigillatas, quas in publicis ostensore presencium audiente produci et legi fecit, ac eciam ad ipsius manus tradidit luculencius discernendas, quarum eciam copias sub manu publica gracie magnificencie vestre pro fide clariori optinenda hic mittimus introclusas. Quibus litteris ac legittimis aliis documentis procurator noster supra dictus sufficienter se asserit et nunc et alias probavisse, navem suam cum bonis suis in valore noningentorum nobilium onustam a potestate et possessione mercenarii sui duntaxat et non a possessione Scotorum hos de Lenne absque iusticia potenter abstulisse, in quibus nondum honorabiles de Lenna conterriti eundem mercenarium diris longo tempore carceribus absque culpa, ut asserit, manciparunt. Propter quod, serenissime princeps et domine magnifice graciose, celsitudini vestre regie, de qua indubii confidentissime speramus, humili desiderio supplicamus, quatenus dominum deum et equitatis tramitem misericorditer pre oculis regalibus habentes, honorabilibus subditis serenitatis vestre hominibus de Lenne mandare e[iusdem] s[erenitatis] v[estre] dignetur cum effectu, ut procuratori sepefato bona sua ut premittitur ablata iuxta iuris naturalis edicta amicabiliter restituant, eo quod idem procurator noster demum paratus est restitucionem eadem percepta bona honorabilium de Lenna per ipsum ut asserit iuste arrestata indilate diarrestare. Scimus, inquam serenissime princeps absque cuiusvis dubii scrupulo, celsitudinis vestre graciam adeo ad nos et ordinem nostrum ac pauperes homines subditos nostros graciosis favoribus affectam fore, quod nullo penitus modo dampna et ablaciones bonorum nostrorum minus iustas gracia magnificencie vestre regie adoptaret, cum revera non solum fidelibus serviciis et optatis, verum eciam oracionibus et devotis. Una cum ordine nostro toto ad quevis gracie vestre regie {S. 140} desideria nos offerimus votivis et sedulis incrementis, omnipotens graciam celsitudinis vestre regie ad tempora feliciter conservare dignetur optata.
Datum in castro nostro Marienburg secunda die mensis junii domini M^o CCCC^mo secundo.