PrUB, JS-JP 20

{Überlieferung}
A = APT ...

{Drucklegungen}
Aus A Hansisches Urkundenbuch, Bd. 4 (1361-1392), bearb.v. Karl Kunze, Halle a. S. 1896, Nr. 767, S. 318-319.

{Regest}
Hanserecesse. Die Recesse und andere Akten der Hansetage, 1. Abt.: von 1256-1430, bearb. K. Koppmann,  Bd. 8, Leipzig 1897, Nr. 907, S. 587.

{Diplomatische Erörterung des Stücks}
Orginal mit Spuren der drei Siegel.

An erbare, wise unde bescheden lude, borghermester unde ratlude in Thoruun, unsen sunderlinghen vrenden, littera presentetur.

Unse vrentlike grute met denste tovoren. Gy heren unde leven vrende. Wy hebben wol ju toscreven vor disser tyt, wes dem kopman weddervaren is, sint de here dat lant wedder wan, also dat wyt vaste vorvolghet hebben vor dem edelen greven van Vlandren silven unde ok vor sinem edelen rade, doch so ist al eyne antworde unde zecghen, dat al vorbort gud is, wes de here in dem lande vant up de tyt, do hi inquam; mer welt de kopman wedderkopen, se willen gherne ghenade don. Want de van Campen moten utgheven van elker last herinx 1 punt grote,²⁾ der ghelike willen se ok van uns luden hebben. Dar wolden wy node an, wer dat uns vryheit mochte helpen; doch so hebbent zom lude van unsem volke utghegheven, um dat de balyou beghan, vaste eren herinc to vorkopene, unde nemen dat ghelt up. Unde ok so hebben zom lude under uns 2 man uteghemaket, um er gud unde erer vrunde gud to vordingene an den heren selven. Aldus en dorste de meyne kopman neynerleye vordink maken, want id jeghen unse vryheit solde ghan; unde ok, makede wy nu vordink, lichte mochte hirna der like vallen. Doch is uns overgheven bi dem heren unde sinem edelen rade, alle lude unde gud, dat int lant komen is ofte komen sal van des, dat de here dat lant wan, dat sal vry keren unde varen op sine vryheit unde op sinen rechten tollen, like dat id voren dede. Ok hebben wy ju wol screven, wo dat gheboden was to Brucge, alle gud, dat dar binnen was, do de stede vordinghet was, dat solde vry wesen 12 grote van dem punde; nu sint komen des heren lude unde hebben ok ghenomen uten herberghen bi 60 stucken wasses, beyde Pollensch unde Ryghes, unde dat gheweghen laten op dit se, is dat eyndracht wert twischen dem heren unde dem kopman, de here salt betalen; anders ist vorbort gud. Ok dunket uns wol, al were unse gud binnen Brucghe vryet, id en were buten nicht vry; aldus so is de kopman al umme besorghet. Unde wy hebben de van Brucghe in allen dachvarden ghebeden unde belastet, des kopmans beste to wetene, dar se grotliken ynne ghearbeydet hebben. Unde noch hebben se ere sendeboden belastet van des ghantzen landes weghen, vor den kopman to spreken, dar de dachvart schal wesen vor dem heren opten irsten donredach in der vastene,³⁾ unde na unsem vorstane zo willen se al ere macht darto don, alse um den kopman in dem lande to blyvene. Ok sint de van Ghent leyder also vorhardet, dat dar neyne beteringe ane vonden wert. Vortmer bidden wy ju vlyteliken, juwen wisen raet hirop to {S. 319} hebbene mit den anderen steden, dat de kopman by like unde bi siner vryheit mochte blyven, unde disse tidinghe laten weten, dart ju best gheliven sal, wente Lubeke unde Sund hebben disser like van uns breve. Unde wy saghen gherne, mochte de kopman bi siner vryheit bliven, wente dar wy pleghen to gheven van eynem stop wyns 1 Engelschen van assyse, dar nemen se nu 3 Engelsche contrarie unser vryheit.⁴⁾ Ok so hebben wy wol breve hat hir vortydes, dat eyn dachvart solde wesen van den steden 14 daghe na paschen⁵⁾ nu irst komende; wor dat wesen sal, oft de kopman dar boden bi hebben sal, dat uns darvan yo antworde kome mit dem irsten, up dat sik de kopman darop moghe richten. Nicht anders op disse tyt. God si met ju in lyve, in zielen, unde ghebiet to unswert. Screven under unsen inghesegelen, opten irsten dinstach van der vastene.

Inhaltliche Anmerkungen:

¹⁾Vgl. dazu die Klageartikel Hanserecesse. Die Recesse und andere Akten der Hansetage, 1. Abt.: von 1256-1430, bearb. K. Koppmann,  Bd. 2, Leipzig 1872, Nr. 343, 3-8, Nr. 344, 3-6, Nr. 345, 3-5.
²⁾S. Hansisches Urkundenbuch, Bd. 4, Nr. 769.
³⁾Februar 12.
⁴⁾Vgl. Hanserecesse. Die Recesse und andere Akten der Hansetage, 1. Abt.: von 1256-1430, bearb. K. Koppmann,  Bd. 3, Leipzig 1875, Nr.336, 16, 21, Nr. 339, 2-3.
⁵⁾April 5.

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/js-jp/js-jp20.htm) und Datum der Einsichtnahme; (2) im Druck: PrUB, JS-JP20 ([1383] Februar 10. o.O.)
Bearbeitungsstand: Text eingegeben (7. September 2001 JPoett) Datum überprüft () Text mit PrUB oder sonst Druck kollationiert () Text mit Or. kollationiert () äußere Merkmale beschreiben ()