PrUB, JS-JL 49

Der allirdurchluchsten Furstynne und hochgebornen frouwen frouwen Margarethe konygynne czu Sweden, Norwen und rechtim Erbeling czu Denmarken unser gnedigen frouwen.

Allirduchluchste furstynne und hochgeborne gnedige frouwe.
Want wir euwer hochmechtige irluchtikeit volkomelich nicht vol danken mogen der eren und woltat, dy ir {S. 89} irczeigit habit unsern sendboten, sundirlich unsers ordins bruder Albrecht grafen von Swarczburg, kompthur czur Swecze, Johan unsern grosscheffer und allen unsern, die mete gewest sint in dem geschefte des allirirluchsten furstyn und herren konig Albrecht von Swedyn, das die so wol und so gutlich gehandelt sint von euwern wegen, des danke wir uch und wellen danken groslichen mit ganczem fleise. Hirumb noch czu volbrengen off eyn gut ende die selbige sache wir abir senden und andirweit czu uch dese czwene ersame geistliche manne, unsers ordins bruder Johan von Schonfelt vogit czu Dirssaw, Johan Tirgard unsern grosscheffer mit den unsern, die wir eigentlich undirwiset han, die sache czu volrekken und vort czu tryben uff eyn lobelich ende semelicher arbeit und muw, sal sie nicht vordryssen uch czu behegelichkeit. Worumb, gnedige frouwe euwer irluchtikeit, wir bitten mit fleislicher begerunge, das ir geruchet gedenken off eynen steten frede allir lande, das sehen wir gerne. Ouch grosmechtige gnedige frouwe, alz ir uns schribet von geleite der euwern czu uns in unser land czu reyten, so wisse euwer hochgeborne irluchtikeit, das alle die, die do unser land suchin und czu uns reyten durch got und durch ritterschaft in reysen die synt geleitet von uns. Und wo wir uch und euwern reiche gedinen mogen und die euwern gefordern noch allir mogelichkeit, das welle wir gerne thun uch czu behegelichkeit und czu danke.
{Datierung} Gegeben czu Marienburg am nesten Sontage vor Bartholomei³⁾ im vunff und nunczigesten jare.