Clemens episcopus servus servorum Dei.
venerabili fratri ... archiepiscopo Bremensi salutem et apostolicam benedictionem.
In nostra sollicita mente versatur precipue illis ecclesiis fructuose provisionis adhibere consilium, quas terris paganorum constiguas carere prospicimus regimine prelatorum.
Ex hoc siquidem procedit et merito, quod ad Pomesanensem ecclesiam in Rigensi provincia constituta, paganis eisdem fere contiguam viduitatis incomoda deplorantem apostolice consideracionis oculos dirigentes, ei de salubri et utili providendo pastore, dispendiis, que propter vacationis longeve discrimina ecclesie viduate consueverunt incurrere, oportuno remedio celeriter occuramus. Sane dudum inter venerabilem fratrem nostrum archiepiscopum Rigensem et Ludechonem fratrem hospitalis sancte Marie Theotonicorum super eo, quod dictus Ludecho in episcopum Pomesanensem canonice se dicit electum, prefatus vero archiepiscopus, metropolitanus loci, electionem hujusmodi de dicto Ludechone, quam fuisse asserit de facto presumptam, multipliciter impugnabat, ac ob hoc asserens, electionem hujusmodi non tenere, materia questionis exorta. Nos causam hujusmodi ad sedem apostolicam legitime devolutam dilecto filio nostro Nicolao tituli sancti Eusebii presbitero cardinali duximus committendam, coram quo super libello pro parte ejusdem Ludechonis oblato, in quo petebat electionem hujusmodi confirmari debere, lite legitime contestata, ac de calumpnia et veritate dicenda prestito a partibus juramento, fuit inter easdem partes usque ad articulorum exhibitionem et ulterius in dicta causa processum.
Nos igitur attendentes, quod super istis cause meritis plenius et citius poterit in illis partibus veritas indagari, sicque hujusmodi negotium, quod apud sedem eandem non absque longe more dispendio finiri posset, in eisdem partibus celerius poterit terminari, ac ob hoc cupientes tam ipsius ecclesie Pomesanensis obviare periculis et utilitatibus providere, quam ipsarum partium laboribus parcere et expensis, gerentes quoque de tue circumspectionis industria fiduciam in Domino specialem, fraternitati tue per apostolica scripta mandamus, quatinus habens pre oculis
{S. 11} solum Deum, legitimo coram dicto cardinale habito servato processu, secundum articulos pro parte dicti archiepiscopi coram dictum Ludechonem exhibitos coram cardinale prefato, inquisita de modo electionis predicte, studiis eligentium et electi meritis diligentius veritate, si electionem ipsam inveneris de persona ydonea canonice celebratam, eam auctoritate nostra confirmare procures, sibique assistentibus tibi duobus vel tribus episcopis gratiam et communionem apostolice sedis habentibus munus consecrationis impendas ac ab eo Rigensis ecclesie nomine, cujus idem electus suffraganeus fore dinoscitur, fidelitatis recipias solitum juramentum. Alioquin eadem electione rite cassata vel cassa et irrita nuntiata eidem Pomesanensi ecclesie hac vice auctoritate predicta aliquam personam ydoneam, super quo tuam intendimus conscientiam onerare, preficias in episcopum et pastorem, curam et administrationem ejusdem Pomesanensis ecclesie sibi in spiritualibus et temporalibus committendo. Per hoc autem eidem archiepiscopo et successoribus suis aut predicte Rigensi ecclesie nullum imposterum prejudicium generetur, contradictores auctoritate nostra appellatione postposita compescendo.
Datum Avinione 13. kalendas Julii pontificatus nostri anno quinto.
Bearbeitungsstand: Text eingegeben (20.3. 2000, Jenks; 4.11.2009, Sarnowsky) – Datum überprüft (20.3. 2000, Jenks) – Text mit PrUB oder sonst Druck kollationiert (20.3. 2000, Jenks) – Text mit Or. kollationiert () – äußere Merkmale beschrieben ()
Datum der Erstanlage: Mittwoch, den 4. November 2009 — Letzte Änderung:
4. November 2009
von Jürgen Sarnowsky
Zurück zur Hamburger
Homepage / zurück zur
Regestenliste für 1310.