1312.03.02.

Sanctissimo patri in domino Clementi, divina providentia sacrosancte Romane ac universalis ecclesie summo pontifici, Philippus, eadem gratia Francorum rex, pedum oscula beatorum.

Noverit vestra beatitudo a fide dignis nobis fore datum intelligi quod, per ea que reperiuntur in inquestis factis contra fratres et ordinem milicie Templi, apparet seu constat de talibus et tantis heresibus et aliis horribilibus et detestandis criminibus eorumdem quod propterea dictus ordo merito tolli debet. Quare, zelo fidei orthodoxe succensi et ne tanta injuria Christo facta remaneat impunita, vestre sanctitati affectuose, devote et humiliter supplicamus quatinus tollatis ordinem supradictum et alium ordinem militarem de novo creare velitis, cui bona ordinis supradicti seu que ordo ipse habebat et possidebat tempore quo magister ordinis et preceptores Francie, terre ultramarine, Normannie Pictavie et Aquitanie et quamplurimi alii fratres ipsius ordinis in grandi numero, videlicet anno Domini millesimo septimo trecentesimo, in regno nostro capti et detenti fuerunt, cum suis juribus, honoribus et oneribus conferatis vel eadem in alium ordinem de antiquis militaribus transferatis, prout ad honorem Dei et utilitatem Terre Sancte vestra beata circumspectio viderit expedire.

Quidquid enim in premissis vos, sancte Pater, duxeritis ordinandum, nos ratum et gratum habebimus et devote recipiemus et observabimus in regno nostro et nostros servare volumus, precipimus et decernimus successores et a subditis nostris faciemus, prout ad nos pertinet, observari; ita tamen quod, bonis ipsis cum honoribus, juribus et oneribus suis salvis remanentibus subsidio Terre Sancte secundum ordinacionem supra scriptam de ipsis faciendam, salva remaneant nobis, prelatis, baronibus, nobilibus et quibuslibet aliis regni nostri jura quacunque, que nobis et aliis personis supradictis competebant ante capcionem predictam.

In cujus rei testimonium et munimen, presentibus litteris nostrum fecimus apponi sigillum.