1307.09.08.

Frater Jacobus de Molayo dei gracia pauperis milicie Templi magister humilis universis eiusdem milicie fratribus in baillivia Aragonie et Cathalonie constitutis salutem in domino sempiternam.

Noveritis quod nos, attendentes industriam et probitatem viri religiosi et providi fratris Eximini de Lenda preceptoris domus nostre de Orta, pensantes eciam utilitatem domus nostre et specialiter baillivie nostre de Aragonia et Cathalonia, ipsum fratrem Eximinum dicte baillivie de Aragonia et Cathalonia fecimus preceptorem. Quare vobis universis et singulis districte percipiendo mandamus quod dicto preceptori vestro obediatis ut decet, exhibentes eidem tanquam nobis in omnibus debitam reverenciam et honorem. Nos enim eidem fratri commisimus quod si quis vestrum in aliquo, quod absit, deliquerit ipsum puniat, corrigat et castiget secundum nostre religionis statuta. Rogamus vos insuper quod si hucusque ad regimen huius baillivie fuistis solliciti et attenti ecetero ad reformationem ipsius de bono in melius efficacius procedatis. Ita quod devotionem vestram proinde possimus dignis in domino laudibus commendare.

In cuius rei testimonium sigillum nostrum duximus presentibus apponendum.