1300.08.17

Jacobus etc. Religioso viro gerenti vices in Aragonia magistri milicie Templi.

Salutem etc.

Cum ad notitiam nostram devenerit quod Ferdinandus natus quondam dompni Sancii de Castella cum gente sua equitum et peditum manu armata versus partes istas accedens ausu tam temerario proponat invader regnum nostrum Aragonie, sic quod iam pervenit quasi ad confinia regni Castelle, et nos intendentes eidem resistere viriliter et potenter mandaverimus nobiles, mesnaderios, milites ac alios de dicto regno parari et vos in casu huiusmodi ad deffensionem regni nostri teneamini nos juvare, ideo vos requirimus ac vobis dicimus et mandamus firmiter et expresse quatenus statim receptis presentibus cum militibus et hominibus quos dictus ordo habet in regno Aragonie paretis vos equis, armis et aliis apparatibus vestris, sic quod statim cum per nos requisiti fueritis vel alias vobis innotuerit per appellitum vel aliis modis hostes nostros predictos accessisse adversus partes istas, ad nos personaliter veniatis, nullo alio a nobis expectato mandato;

scituri quod si secus feceritis contra vos et bona dicti ordinis tanquam contra illos qui sic inhumaniter pugnare pro patria negligent prout juste fuerit procedemus.

Datum Cesarauguste XVI. kalendas septenbris anno domini M. CCC.