1294.12.10

Nous, Guis, cuens de Flandres et marchis de Namur, faisons sauoir a tous cheaus ki ces presentes lettres veront et oront, ke nous deuons comme no propre dette a religieus homme, no boin ami frere Jehan de Tour, treshorier de le maison de le chaualerie dou Temple en Paris et a celui qui ceste lettre aportera mil liures tous par.

Les quels deniers il nous a prestes, creus et deliures a no grant besoing et li proumetons et auons enconvent a rendre et a paiier au paiement de la foirre de Bar le prochainne que nous attendons.

Et tous le cous, les frais et les damages que li deuantdis frere Jehans et chius qui ceste lettre aportera et avoit et foroit par le deffaute de no paiement nous li renderiemes et paieriemes parmi sen plain dit sans autre promiance faire auoech le principal dette deuantditte.

Et quant a che faire et tenir que deuant est dit nous auons oblegie et oblegons tous nos biens temporeus, meubles et nonmeubles et que nous les aions et arons et les biens de nos hoirs, contes et segneurs de Flandres par le tesmoing de ces lettres saiclees de no seel ki furent faites et donnees lan de grasce mil deus censquatrevins et quatorse..

Le diemence deuant le jour saint Nicaise.