1292.04.20

Frere Jaque de Molay per la grace deu humble mastre de la povre chevalerie dou Temple et le c[ouv]ent de cele meissme chevalerie au r[eli]gios et honeste frère Berenguer de Cardon … des maissons de cele meissme chevalerie en Aragon et en Cateloingnie, salus en nostre seingnor.

Cun vos nos ayes fait assaver d’aucunes chozes qui sont en la bailliee d’ Aragon mal assizes des ques le Temple ne se peut ayder a nostre profit, nos reguardant vostre grant sen et vostre leaute et le grant ses qui est en les prodes homes de la baillyee d’ Aragon et le bon portement qu’il ont en tos jors au profit dou Temple, dou chastel de Pui Rei et de la maisson de La Ssaide metons en vostre discrecio et en vostre conoissance et des prodes homes de a bailliee d’Airagoun et dou chapistre jeneral de la terre;

que le devant dit chastel de Pui Rei et la maisson de La Ssayde puisses vendre ou changer por leuc coneu ou meismement le dit pris returner en leuc coneu ed d’autres piesses de terre;

que vos puisses vendre et torner le pris en achat en leuc profitable ou changer por leuc profitable a la maisson o … cuns petis leus en lesmontaingnies mal assis et que ce faites per vostre grant consseill.

Et de la leude et des payages de ques on ne vos laisse user ensi cu nest droit et est acostume et cun vos aves les proveliges et vos contrasstent por le grant damage que nos entendons qu’en vient au Temple et en est avenue, laissons en vostre discrecion et en vostre conoissance se que vos en fer[es] per le conseil d’une grant partie des prodes homes de labaillyee d’ Aragon et de vos sages que a nos plaist et tenons por fermese que vos en feres, savut que vos n’ayes poer de vendre ni d’enguager ni de changer ni d’aliener le dit paiages et le leudes.

Et nos prions a vos et as prodes homes de la baillyee d’Aragon que en cestes chozes menes a faire sagement et meurement en tal manere que il soient au profit dou Temple et al honor de vos et que puisses aver bon los dou monde et profit dou cors et de l’arme.

Et en greingor fermete de ce nos avons fait faire ces pressentes letters saclees de nostre seau de cire de la tube pendant o la guarentye de nos prodes homes des ques se sont les noms:

frère Baudeuin de la Andrin mareschal; frère Berenguer de Saint Just comandor de la terre; frere Gaucher de Liencort tenant leuc de draper; frere Guillen de la Tor turcopler; frère Raymon de Barberan sous-mareschal; frère Martin de Lou tressorer; frère Guillend’Ourenc comandor de la vote.