1291.08.02

Noverint universi quod in presencia mei Petri Acerii notarii publici Ilerdensis et testium infrascriptorum Bernardus Menaguerra presentavit et legi fecit. Romeo de Solerio portario Infantis P. quandam litteram eiusdem domini Infantis P., tenor cuius talis est:

Infans P. illustris domini P. inclite recordacionis regis Aragonum filius ac procurator regnorum Aragonie, Mayoricarum et Valencie ac comitatus Barchione fideli portario suo Romeo de Solerio, salutem et gratiam.

Licet vobis mandaverimus quod petatis cenam in Villa Nova de Remolins et aliam cenam in Turribus milicie Templi, dicimus et mandamus vobis quatenus, si constiterit vobis dicta loca esse sub una bajulia seu comendatoria, non petatis nisi unam cenam et de altera penitus desistatis.

Et si qua pignora inde fecitis ipsa comendatori dictorum locorum vel hominibus eorumdem restituatis et restitui faciatis. Datum Barchione IIII. Kalendas augusti anno domini M. CC. XC. Primo.

Qua littera lecta et presentata, dictus Bernardus Menaguerra dixit dicto Romeo de Solerio quod cum loca de Turribus et de Villa Nova de Remolins sint sub una bajulia seu comendatoria quod ab altera duarum cenarum quas petebat locis predictis desisteret juxta mandatum domini Infantis predicti.

Qui Romeus de Solerio predictus respondit quod deliberaret et compleret predictum mandatum predicti domini Infantis P. Presentata et lecta fuit hec littera prefato Romeo de Solerio quarto nonas augusti anno domini M. CC. XC. Primo, presentibus Ferrario dez Chaus curssore et Raymundo de Montaynnana mercatore Ilderdensi, testibus ad hoc specialiter rogatis ac convocatis.

Signum mei Petri Acerii notarii publici Ilderdensis qui hoc scripsi et predictis omnibus interfui et presens fui.