1291.05.18

A tres noble home, puissant et sage, son chier segneur et ami en Jesucrist, a mesire Gui, conte de Flandres et marchis de Namur, Frere Jahen de Tour, tresorier de la meson du Temple de Paris, saluz et amour enterine aveques soi tout apareillie a ses bons plesirs.

Sire, nous auon receues voz amiables letres par les queles vous nos requerez respit juques a la Touz sainz qui vient prochiene de ce que vous nos deuez en vous escousant que nous ne poon estre poiez a ceste prochiene feste saint Jahen baptiste por le grant empeeschement de vostre guerre.

Et ja se ce, sire, que nous soion mout angoissens et en granz gries et grant sousi de secourre a la sainte terre, si comme les freres de la cheualerie du Temple en Acre si atendent touz jours et pour ce nous conuient il pochacier contre nostre chapitre, ce que len nous doit et autres choses pour eus secourre et aidier.