1281.04.22

Martinus episcopus servus servorum dei dilectis filiis .. magistro et fratribus domus milicie Templi Ierusolimitani salutem et apostolicam benedictionem.

Cum a nobis petitur, quod iustum est et honestum, tam vigor equitatis quam ordo exigit rationis, ut id per sollicitudinem officii nostri ad debitum perducatur effectum.

Eapropter, dilecti in domino filii, vestris iustis postulationibus grato concurrentes assensu omnes libertates et immunitates a predecessoribus nostris Romanis pontificibus per privilegia vel indulgentias domui vestre et vobis concessas necnon libertates et exempciones secularium exactionum a regibus seu princibus vel alii Christi fidelibus rationabiliter vobis indultas, sicut eas iuste ac pacifice obtinetis, vobis et per vos eidem domui auctoritate apostolica confirmamus.

Nulli ergo omnino hominum liceat hanc paginam nostre confirmamtionis infringere vel ei ausu temerario contraire.

Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum.

Datum apud Urbemveterem X kalendas maii, pontificatus nostri anno primo.