1265.09.04.

Clemens episcopus servus servorum dei dilectis filiis magistro et fratribiis militie templi Jerosolimitani salutem et apostolicam benedictionem.

Quanto devotius divino vacatis obsequio personas et bona vestra pro terre sancte subsidio totaliter exponendo, tanto quieti vestre libentius providemus. Hinc est, quod nos vestris devotis supplicationibus inclinati ad instar felicis recordationis Urbani pape III predecessoris nostri auctoritate vobis presentium indulgemus, ut ad contribuendum in aliquibus talliis, collectis seu pecunie summis aut exactionibus aliis, quocumque nomine censeantur, aut ad exhibendum aut prestandum easdem pro quavis persona, ex quacumque causa ipsas imponi contingat, ratione ecclesiarum, domorum seu quarumcumque possessionum vestrarum minime teneamini nec ad id compelli aliquatenus valeatis auctoritate litterarum apostolice sedis vel legatorum ipsius impetratarum vel etiam impetrandarum absque speciali mandato sedis einsdem faciente plenam et expressam de indultu huiusmodi mentionem.

Nos enim excommunicationis et interdicti sententias, si quas in vos vel aliquem vestrum contra tenorem indulti huiusmodi a quoquam promulgari contigerit, decernimus irritas et inanes. Nulli ergo omnino hominum liceat hanc paginam nostrae concessionis et constitutionis infringere vel ei ausu temerario contraire. Si quis autem hoc adtemptare presumpserit, indignationem omnipotentis dei et beatorum Petri et Pauli apostolorum eius se noverit incursurum.

Datum Assisii 2 Non Septembris, pontificatus nostri anno primo.