1265.06.08.

Clemens episcopus etc. venerabilibus fratribus archiepiscopis et episcopis et dilectis filiis archidiaconis ad quos littere iste pervenerint, salutem et apostolicam benedictionem.

Cum dilecti filii nostri fratres militie Templi Jerosolimitani nullum habeant episcopum vel prelatum preter Romanum pontificem et speciali prerogativa gaudeant libertatis, non decet vos in eos vel clericos aut ecclesias eorum, in quibus potestatem ecclesiasticam non habetis, absque mandato nostro excommunicationis vel interdicti sententias promulgare, sed si quando vos vel subditos vestros iidem fratres injuste gravaverint, per vos vel nuntios vestros id Romano pontifici signare debetis ac per ipsum de memoratis fratribus iustitiam obtinere.

Inde est, quod universitati vestre ad instar felicis recordationis Innocentii et Urbani predecessorum nostrorum Romanorum pontificum per apostolica scripta precipiendo mandamus, quatinus in predictos fratres sive clericos aut eorum ecclesias, in quibus auctoritatem nequaquam habetis, excommunicationis vel interdicti sententiam promulgare nullatenus presumatis nec eos alias indebita vexatione gravetis, sed erga ipsos vos taliter habeatis, quod non habeant adversus vos materiam querelandi, scituri, quod si mandatum nostrum neglexeritis, in hac parte dimittere non poterimus, quin eisdem fratribus in sua justitia, si apud nos querimoniam iterum deposuerint, efticaciter providere curemus.

Datum Perusii 6. Id. Junii, pontificatus nostro anno primo.