1265.05.31.

Ut confugientibus ad domos nostras pro sua salute vel in res eorum infra ambitum domorum nostrarum quis non potest manus injicere violentas.

Clemens episcopus servus servorum dei venerabilibus fratribus archiepiscopis et episcopis ac dilectis filiis abbatibus, prioribus, decanis, archidiaconis et aliis etc.

Pervenit ad nos ex conquestione religiosorum virorum fratrum militie Templi Jerosolimitani, quod cum aliqui ad domos eorum pro salute sua se transferunt aut res suas deponunt, hostes eorum infra ambitum suarum domorum eos et res suas dei reverentia et timore postposito capiunt et captos incarcerant et ad redemptionem compellunt.

Quoniam igitur id indignum est penitus et absurdum et fidelium saluti prorsus contrarium, ad exemplar felicis recordationis Alexandri pape predecessoris nostri universitati vestre per apostolica scripta mandamus precipiendo, quatinus universos generaliter sub excommunicationis interminatione prohibere curetis, ne illos, qui ad domos dictorum fratrum pro salute sua con fugiunt, vel in res eorum infra ambitum domonim ipsarum violentas manus injiciant.

Si qui autem prohibitionis vestre fuerint transgressores, ipsos contradictione et appellatione cessante vinculo anathematis astringatis et faciatis usque ad dignam satisfactionem sicut excommunicatos ab omnibus evitari. Provideant tamen fratres, ut homicidis et pestilentibus hominibus ad dispendium pacis atque justicie sub hac indulgentia nisi forte intercedendo presidium non impendatur.

Datum Perusii 2. Kal. Junii, pontificatus anno I.