1262.12.18.

Nos frere Thomas Berard, par la grace de deu humble maistre de la chevalerie de la maison dou Temple et nos le couent de cele meisme maison faisons asaueir a toz ceaus, qui sunt et serunt,

que cum ce fust chose que contens fust entre nos d'une part et vos, frere Hugue Revel, par cele meisme grace honorable maistre de la maison del hospital de Saint Johan de Jerusalem, et nos le couent de cele meisme maison de l'autre sur le fait dou casale qui a nom Alme et ses apartenances, lequel casal nos auiens en eschange dou noble home mesire Johan de Montfort, seignor dou Thoron, por ce que vos les dis {73} maistre et couent del hospital entendiez auoir raison ensi cum vos disiez et les nos bees a demander par plait eu la cort de l'iglise.

Nos le dit maistre et le dit couent de la maison dou Temple por la paix et la concorde et l'amor tenir et maintenir entre vos et nos avons rendu ou devantdit seignor dou Thoron le devantdit casal Almes ou toutes ses apartenances et l'en avons mis en corporel saisine et teneure et otreions et prometons et somes tenus por nos et por nos successors a vos les devantdis maistre et couent del hospital et a voz successors de non prendre ne receveir le dit casal d'Alme et ses apartenances en achat ne en eschange ne en apaut ne en gagiere ne en garde ne en comande ne autre maniere d'alienement jusques a tant que par le cort de l'iglise ou de cele dou reyauine de Jerusalem soit donee sentence definitive, se le dit casal d'Alme deit estre votre ou de votre maison ou non, sauf ce que tant come le devantdit seignor dou Thoron ou ses heirs tenront ou posseeront le devantdit casal et ses apartenances, que nos puissons acheter ou eschanger les rentes et les fruis dou dit casal et ses apartenances, par ensi que ce non torne ne seit a prejudice de votre maison ou autre contraire, et prometons et somes tenus encores por nos et por nos successors a vos les devantdiz maistre et couent de l'avantdite maison de l'hospital et a vos successors, que nos ne serons contraire ne nuisans par nos ne par autre dou fait d'Alme et de ses apartenances a vos ne autre maisons ne aidant au seignor dou Thoron ne a ses heirs ne a autre por eaus contre vos et votre maison sur le fait dou dit casal et ses apartenances, sauf ce se il fust coneu par dreit en la cort de l'iglise, que nos fuissiens tenus d'aidier le sire dou Thoron et ses heirs dou fait d'Alme par les tenors des preveliges que sunt fait entre nous et lui de l'eschange d'Alme et de ses apartenances et de Margelion, des quels preveliges les transcris sunt saeles de notre sael et des seiaus des arbitres, cest asaueir de l'onorable pere mesire Thomas, par la grace de deu evesque de Bethleem, et legat de l'apostolial siege, et frere Herreman de Heldrongue, grant comandeor de la maison de notre dame des Alemans ou reyaume de Jerusalem et tenant leu de maistre, et de mesire Gefrei de Sergines, seneschal et bail dou reyaume de Jerusalem et de mesire Guillaume seignor dou Thoron et conestable dou dit reyaume.

Et se il aveneit que le seignor dou Thoron nos meust question ou plait sur le fait de lui aidier contre vos sur le fait d'Alme et ses apartenances, le plait se defendra par le conseil des proudeshomes de votre maison et de la notre, et vos, le devantdit maistre et couent del ospital, aves promis et estes tenus por nos et por nos successors, que toutes les feis, que vos aures Alme et ses apartenances par quelque maniere que ce soit, que vos donrez a nos ou a noz successors ou a nos comandemens le dit casal d'Alme et ses apartenances a la requeste de nos ou de nos successors ou de nos comandemens donant nos a vos ou a voz successors ou a vos commandemens l'eschange que nos aurons eu dou seignor dou Thoron por le dit casal et ses apartenances.

Et encores vos les diz maistre et couent de la maison de l'ospital avez promis et estes tenus que vos le huitovre prochein venant en avant comenceres le plait dou fait d'Alme contre le seignor dou Thoron et le porsuires jusques a sentence difinitive.

Toutes les feis que vos ne autre por vos n'en teures Alme et por ce non demore quo vos ne puissies porchacier votre raison dou fait d'Alme, si cum il vos semblera. Et se il avenait que vos eusses sentence {74} difinitive encontre vos dou fait d'Alme, de celui jor en avant nos et nos successors puissens sans mesprendre faire notre protit et notre meaus d'Alme et ses apartenances, si come il nos semblera. Les queles choses desus dites toutes ensemble et chascune par sei nos les diz maistre et couent dou Temple otroions et prometons et somes tenus por nos et por nos successors a vos les dits maistre et couent del ospital et a vos successors de tenir et maintenir et accomplir a bone fei et de non aler a l'encontre fust en tont ou en partie por quelque manière, raison ou achaison ce fust sos peine de quatre mile marc d'argent fin, laquel peine paiee ou non paiee toute les choses desus dites si cum eles sunt desus devisees soient tenues et maintenues fermes et estables.

Por laquel peine desus dite nos les diz maistre et couent dou Temple por nos et por nos successors obligons a vos, le diz maistre et couent del Ospital, et vos successors toz les biens de notre maison, moebles et non moebles quels que ils soient et ou que ils soient au meaus aparant, et renoncions des orendroit a benefice de la restitucion en entier a toutes raisons, excepcions et defensions, previleges, indulgences et rescris que nos aions ou puissons avoir, et a toutes aides de lois, de decres, de decretales, d'usages, d'assises et de constitucions vielles et noveles par lesquels nos ou nos successors ou autre por nos puissons aidier, defendre ou aler ou faire contre les choses desus dites ou d'aucunes d'eles.

Et por ce que nos volons que toutes les choses desus dites soient tenues et maintenues a toz tems fermes et estables, nos avons fait faire cest present escrit et bouler de notre boule de plomb empreinte en noz dreis coins o la garantie de nos freres, des quels ce sont les noms: Guillaume de Malay mareschal, frere Guillaume de Montignane grant comandeor, frere Gonsalve Martin comandeor d'Acre, frere Gerard de Burgues comandeor des chevaliers, frere Henri de Lyon turcoplier, frere Piere de Cayre et frere Gui d'Aubon, nos compaignons, frere Bienvenu tresorier et plusors autres freres de notre maison.

Ce fu fait en Acre l'an de l'incarnation notre seignor Jesu Christ mil et deux cens et sissante deus le dishuitieme jor decier.