1262.05.31.

Nos frere Thomas Berard, par la grace de Deu humble maistre de maison de la poure chevalerie dou Temple, et nos le covent de cele meisme maison, faisons asavoir à toz ceaus qui sunt et serunt, que cum ce fust chose que nos ledit maistre et ledit covent, d'un / assent et d'une volenté, por le profit et le repos de la crestienté et proprement dou reyaume de Jerusalem et de nos et de nostre maison, por abatre les contens qui ont esté de nos à la maison del Hospital de saint Johan de Jerusalem, et por eschiver ceaus que avenir y peussent; nos fussiens compromis en l'enorable pere frere Thomas de l'ordene des Preschors, par la grace de Deu evesque de Bethléem et legat de l'apostolial siege,(1) et en frere der Herteman de Helderong, grant comandeor de la maison del Hospital de Nostre Dame des Alemans ou reyaume de Jerusalem et tenant leu de maistre,(2) et en messire Joffrei de Sergines, seneschal et bail dou reyaume, (3) et en mesire Guillaume, seignor dou Boutron, et constable doudit royaume,(4) si cum en arbitres, arbitrans, arbitreors et amiables compositors haut et bas de toutes quereles, contents et discordes et questions que nos aviens ou aveir poions à la dite maison del Hospital, nos, le desus nomé maistre et le covent dou / Temple, d'un assent et d'une volunte, por nos et por noz successors tenant et porsivant le dit des arbitres desus motis, quitons et renuncions à vos frere Hugue Revel, honorable maistre de la sainte maison del Hospital de saint Johan de Jerusalem, et à vos le covent de ladite maison del Hospital, recevant por vos et pro voz successors toz drois, toutes raisons, actions, seignories et dreitures que nos avons ou aveir poions par quelque raison et ocheison que ce soit au casal qui est apelez Cabor, lequel siet en la diocese d'Acre, ou toutes ses apartenances, ses possessons, ses teneures et ses raisons et ses dreitures, quels qu'eles soient, et en quel leu que eles soient.

Et ceste devant-dite quitance et renumciation, si cum il est desses devisé, faisons nos le desus nomé maistre et covent dou Temple à vos, le desus dit maistre et covent del Hospital por ce que vos ledit maistre et ledit covent del Hospital quités à nos ledit maistre et ledit covent dou Temple et à noz successors toz drois, toutes raisons, actions, seignories et dreitures que vos avié ou aveir poez, par quelque raison et ocheison que ce soit, au Caymont et à la seignorie dou Caymont, et au casal qui est apelez la Feve, / et au casal qui est apelez Damor, qui siet en la seignorie de Saette, ou toutes leur apartenances et leurs possessions et leur teneures et leur raisons et leur dreitures, quels qu'eles soient et en quelque leu qu'eles soient.

Et por ce que nos ledit maistre et le covent de la maison dou Temple volons que toutes les choses desus dites, si cum eles sunt desus devisées, soient tenues et maintenues à toz tens fermes et estables, si com nos ne noz successors ne autre por nos ne por noz successors n'en puissens aler à l'encontre des choses desus dites ou d'aucunes d'eles, avons nos fait faire cest present privilege et bouler de nostre boule de plomb, emperinte en noz drois coins generals, o la garentie de noz freres, desquels ce sunt les noms:

Frere Amaury de la Roche, grant comandeor; Frere Guillaume de Malai, tenant leu de mareschal; Frere Gonsalve Martin, comandeor de la maison d'Acre; Frere Richart de Lop, drapier; Frere Guillaume de Montaignane, comandeor des chevaliers; Frere Hervi de Lyon, turcoplier; Frere Symon de la Tor, chastelain dou Saphet; Frere Guillaume de Vanoz, chastelain de Chastel Pe- / lerin; Frere Guillaume dou Castel, chastelain de Beaufort; Frere Piere dou Cayre, et frere Daubon, nos conpaignons, et plusors autres de noz freres.

Ce fut fait en Acre, l'an del incarnacion nostre seignor mil et deus cens et sissante et deus, le derain jor dou mois de May.