1259.02.01.

De procurationibus legatorum et nunciorum sedis apostolice, quibus contribuere non tenemur.

Alexander episcopus servus servorum dei dilectis filiis magistro et fratribus domus militie Templi Jerosolimitani.

Desideriis vestris in hiis affectu benivolo debemus annuere, que {68} vos digne possint a dispendiis preservare. Sane petitio vestra nobis exhibita continebat, quod sepe contingit, quod venerabiles fratres nostri archiepiscopi et episcopi ac dilecti filii abbates, priores et clerici suarum civitatum et dioecesum se in procurationibus legatorum et nunciorum sedis apostolice nimium aggravari ab eadem sede ad certos executores litteras impetrant, ut alios archiepiscopos, episcopos et abbates, priores, clericos religiosos et alios cuiuscunque ordinis ad contribuendum eis super huiusmodi procurationibus sublato appellationis obstaculo auctoritate nostra compellant, non obstantibus quibuscunque apostolicis litteris vel indulgentiis cuicunque loco et persone concessis, quod ad contributionem huiusmodi minime teneantur vel non possint per litteras ipsas cogi.

Quare nobis humiliter supplicastis , ut providere vobis super hoc paterna sollicitudine curaremus. Cum autem non sit intentionis nostre, ut ad vos vel domos aut ecclesias vobis subjectas littere huiusmodl extendantur, devotioni vestre auctoritate presentium vobis indulgemus, ut vos vel domus aut ecclesie ipse ad contribuendum in huiusmodi procurationibus per tales litteras, que de hac specialiter indulgentia et ordine vestro plenam et expressam non fecerint mentionem, minime teneamini nec compelli aliquantum valeatis. Sententias similiter quoque, si quas in vos vel domos aut ecclesias ipsas auctoritate litterarum huiusmodi promulgari contigerit, decernimus irritas et inanes.

Nulli ergo etc.

Datum Anagnie Kal. Februarii, pontificatus anno V.