1257.03.06.

Alexander episcopus servus servorum dei dilectis filiis magistro et fratribus militie Templi Jerosolimitani salutem et apostolicam benedictionem.

Ad assiduum Christi servitium deputatos favore prosequi {65} Romana debet ecclesia, ut in illos potissimum gratiam sue benignitatis extendat, qui vacando divinis officiis noscuntur amplius promoveri. Quia igitur eterni regis beneplacitis vos totaliter mancipastis, cum acceptabile valde ipsius obsequium personarum periculis minima formidatis intrepidis prosequamini animis et viribus indefessis pro terre Jerosolimitane tutela Christi sanguine rubricate emtione decertantes, decet profecto et expedit, ut copiosis vos corroberemus favoribus vestroque ordini apostolice gratie dexteram porrigamus.

Cum igitur apostolica sedes nonnulla privilegia et quam plures indulgentias eidem ordini sub diversitate temporum duxerit concedenda, nos cupientes ea, que ipsi ordini et vobis a predicta sede conscessa sunt, non solum integra et illesa servare, ymo potius quantum cum Deo possimus, adaugere, vestris supplicationibus inclinati, huiusmodi privilegia, indulgentias et gratias dicto ordini non obstantibus quibuslibet constitutionibus, provisionibus, diffinitionibus, ordinationibus et declarationibus factis et promulgatis a sede predicta, per quas vestris privilegiis et indulgentiis, gratiis et libertatibus in nullo derogari volumus, auctoritate apostolica confirmamus et presentis scripti patrocinio communimus decernentes omnes exactiones, interdicti et suspensionis sententias, si quas in vos vel vestrum aliquos aut in ecclesias seu quelibet loca dicti ordinis pretextis predictarum constitutionum, provisionum, deffinitionum, declarationum necnon litterarum super his a sede obtentarum eadem promulgari contigerit, irritas et inanes, declarationem tamen, constitutionem et ordinationem a predicta sede factam vel editam super decimis novalium et circa indultum apostolicum, quod plerisque conceditur, ut pro ea portione, qua veteres eos contingunt novalium decimas, percipere valeaut, volumus et precipimus inviolabiliter observari. Nulli ergo omnino etc.