1255.12.12.

Alexander episcopus servus servorum dei dilectis filiis magistro et fratribus militie Templi salutem et apostolicam benedictionem.

Ex parte vestra fuit propositum coram nobis, quod cum contingat vos frequenter aliquos ex vestris fratribus pro colligendis elemosinis et aliis vestris necessitatibus cum litteris apostolicis, prout vobis indultum est a sede apostolica, destinare, nonnulli archiepiscopi, decani christianitatis et alii ecclesiarum rectores, presbiteri et capellani occasionem ex eo indebitam assumentes, quod in eisdem litteris in salutationis alloquio de ipsis expresse mentio non habetur, quamquam archiepiscopis et episcopis, abbatibus, prioribus, archidiaconis, decanis et aliis ecclesiarum prelatis huiusmodi littere dirigantur, litteras ipsas recipere et que in eis continentur implere pro sue voluntatis arbitrio contradicunt in vestrum non modicum prejudicium et gravamen.

Quare nobis humiliter supplicastis, ut salubre super hoc remedium adhibere paterna sollicitudine curaremus. Nos igitur vestris devotis precibus inclinati, quod predicte persone sub illo generali verbo „et aliis ecclesiarum prelatis" in hoc casu debent intelligi ad instar felicis recordationis Innocentii pape predecessoris nostri auctoritate presentium declaramus.

Nulli ergo etc.

Datum Anagnie 6 Id. Decembris, pontificatus nostri anno primo.