1255.09.06.

De gratiarum actione post partum et sepultura mulierum et puerorum hominum mansionariorum et confratrum Templi.

Alexander episcopus servus servorum dei dilectis filiis magistro et fratribus domus militie Templi Jerosolimitani salutem et apostolicam benedictionem.

Solet annuere apostolica sedes piis votis et honestis petentium precibus favorem benivolum impertiri. Ex parte siquidem vestra fuit propositum coram nobis, quod nonnulli prelati et eorum officiales ac etiam ecclesiarum parochialium rectores mulieres hominum et mansionariorum ac confratrum vestrorum et alias mulieres terre domus vestre post partum ad agendas gratias ad eorum ecclesias accedentes et tam ipsas, si decesserint, quam infantes earundem necnon et alios pupillos predicte terre, cum moriuntur, ad ecclesiasticam sepulturam in vestrum prejudicium non admittunt, occasionem pretendentes ex eo, quod mariti mulierum et patres infantium et pupillorum predictorum aliqua sunt excommunicatione ligati, quamquam mulieres ipse maritis et pupilli patribus in crimine non communicant et antea nec mulieres ipse nec infantes seu pupilli prefati nominatim excommunicati fuerint vel etiam interdicti.

Quare nobis supplicastis, ut providere super hoc tam vobis quam ipsis patema sollicitudine curaremus. Nos igitur vestria supplicationibus inclinati, ut nullus predictorum mulieres ipsas a gratiarum actione post partum et tam ipsas quam dictos infantes et pupillos ab ecclesiastica sepultura seu aliis ecclesie sacramentis hac occasione excludere valeat, ad instar felicis recordationis Innocentii pape predecessoris nostri auctoritate vobis presentium indulgemus.

Nulli ergo etc.

Datum Anagnie 8 Id. Septembris, pontificatus anno I.