1255.07.12.

Recommendatio pro collectis faciendis.

Alexander episcopus servus servorum dei venerabilibus fratribus archiepiscopis et episcopis et dilectis filiis abbatibus, prioribus, decanis, archidiaconis, archipresbiteris et aliis presentes litteras inspecturis salutem et apostolicam benedictionem.

Cadere debet super omnium corda fidelium frequens dilectorum filiorum magistri et fratibus domus militie Templi Jherosolimitani [...], si quis cogitationibus cogitetur et ad compatiendum eis ac pro viribus succurrendum omnes, qui aliqua humanitatis gestant viscera, efficaciter invitare. Ipsi quidem pro universo christiano popuIo contra fidei catholice inimicos in partibus Jerosolimitanis, ubi redemptor noster in salutis humane pretium sanguinem suum fudit, continuas excubias observantes, ne terra illa eodem sanguine consecrata infidelium dominio in totius christianitatis opprobrium et christianorum periculum totaliter prophanetur, adversus continuos adversariorum insultus diei et estus pro ceteris cause communis consortibus pondus portant et vitam suam pro salute omnium exponere non verentes temporibus preteritis, quorum recens adhuc exstat memoria, multas personarum strages et immensa rerum dispendia pertulerunt.

Non enim communis fama subticuit eis, qui presentialiter non viderunt, quod a quindecim annis citra predicte domus fratres et homines fere usque ad internecionem novissimam hostilis impetus ter assumpsit eorumque facultates sic in equis, armis et bonis aliis fatigavit, quod nisi dominus, qui laternam eorum non permittit extingui, semen modicum in paucis superstitibus fratribus non reservasset, cecidisset omnino illa celebris columpna fidei orthodoxe et quasi ad oppressionem eorum manus infidelium parum valida videretur.

Addidit crucis persecutoribus quondam Fridericus olim imperator tyrannidis sue robur ipsum magistrum et fratres possessionibus et redditibus, quos habent in regno Sicilie, nequiter spoliando eosque detinendo pro iniquitatis sue injusticiam diutius occupatos, quibus adhuc incumbant pristine malignitatis reprobi successores, ut taceamus, quot fratres omiserint, quanta bona perdiderint in illa flebili strage, quam carissimum in Christo filium nostrum regem Francorum illustrem cum christiano populo ex occulta dispensatione divini iudicii incurrisse non absque dolore et gemitu memoramus. Verum ad tot reparanda domus predicte dispendia et reparanda tam enormia divine substancie detrimenta, ipsi magister et fratres tamquam viri constantes, tenaces propositi et adversitatem congressibus viriliter reluctantes dura excogitavere remedia, per que imminentibus facultatum suorum defectibus obvietur.

Ut enim domus ipsorum pene succissa repulluletur ipsiusque fere dejecta potentia vigore pristino reformetur, attenuant per indictam sibi censuram realis parsimonie vires suas in artam corpora sua brevioris victus angustiam redigentes ac privatis detrahentes necessitiitibus, unde publice utilitatis negotium convalescat nec per inflictam sibi sponte necessariorum indigentiam fratres ipsi circa predicte terre negotium remittantur, quin prefato regi et exercitui christiano assistant assidue et continue collaborent, vite non ociose militiam in castrensibus occupationibus transigentes pro zelo publici commodi quietis proprio commoditatibus abdicatis.

Cum itaque domus ipsa sub hiis et gravium debitorum, que propter hec subiit, gravibus sarcinis nequeat diutius respirare, nisi fidelium caritativis largitionibus adjuvetur, quin potius timeatur, quod graviter sit casura, nisi dominus supponat manum suam, nos, ut tantum nominis christiani falcimentum et tam validum propugnaculum , quod contra hostes fidei divina exegit dispositio, non vacillet, cupientes remedium adhibere, universitatem vestram rogamus, monemus et hortamur attente per apostolica scripta mandantes vobis, quatinus opus domini adjuvantes subditos vobis populos et Christi fideles, ut fratribus dicte domus ad exentrationem debitorum huiusmodi manus porrigant adjutrices, per vos et alios monere attentius ac sollicite inducere singuli procuretis. Itaque eadem domus ab imminenti sibi ruina liberari ac iidem fideles una vobiscum per hec et alia bona, que domino inspirante feceritis, ad eterne possitis felicitatis gaudia pervenire.

Nos enim de omnipotentis Dei misericordia et beatorum Petri et Pauli, apostolorum eius, auctorltate confisi ac illa, quam nobis deus licet indignis ligandi atque solvendi contulit potestatem, omnes, qui eisdem fratribus de bonis sibi a deo collatis caritativum et competens ad hoc subsidium largiantur, ad instar felicis recordationis Innocentii pape predecessoris nostri volumus atque concedimus, quod vos diligentius exponatis eisdem, illius remissionis esse participes juxta quantitatem subsidii et proprie devotionis affectum, que transfretantibus in terre sancte subsidium a sede apostolica est concessa.

Datum Anagnie 15. Kal. Augusti. Pontificatus anno I^o.