1252.10.00.

Sachent tuit cil qui sunt et serunt que nos / frere Thomas Berart, par la grace de Deu humle maistre de la chevalerie dou Temple,(1) par le conseil et la volonté et l'otroi de nostre covent, avons octroié et somes tenuz nos et nostre dit covent et nos successors apres nos à vos Henri, seignor de Gibeleth,(2) Guillaume, seigneur de Botron,(3) Mellior, seigneur de Mareclée,(4) les enfans Bertran de Gibeleth,(5) Jehan, mareschau de Triple,(6), Jehan Pharabel, seigneur dou Pui,(7), Hugue Saleman, Thomas Arra, Raimont de Mareclée,(8) Baudoin de Mont Olif,(9) Johan, viscount de Triple,(10) / Ingue Embriac, Gui dor Patriarche, (11) Raimont de Vedde, Johan de Flaencort, Bertran Faisan, Piere Loup, Pehlippe Estomac, Hue de Mareclée, Piere de la Tor, Johan d'Arches, et Jaques de Thabore, et à vos homes et à vos hers, que totes les fois que vous les devans només o vos homes o vos hers aurois à requere ou à demander au prince ou à ses homes ou as gens de Triple tant que vous aiés finées vos querelles; et que vos et vos homes et vos hers soiez en nostre garde et en la guarde de nostre maison et de nostre covent et en nostre conduit et en nostre seurté, alant et venant et demorant à Triple, eaus et ciaus qui vos seront mestier ou pront aver mestier à ce que vos requierreiz ou demandereiz.

Et les VI qui doivent conoistre ou jugiez les dites requestes ou demandes qui seront mis par les devans nommés sunt en nostre guarde et en nostre seurté et de nostre dite maison et de nostre covent, tot ausi que il est desus dit des autres, et puent aler et venir demorer / à Triple totes les feis que il leur sera mestier de conoistre et de jugier aucunes des requestes ou demandes, si com il est desus dit. Et le treszime se il est de la partie des desus motis ausi. Et li XIII devant dit doivent estre asamble dedenz les XV jors que l'une des parties ou aucune de la partie auroit requis ou fait requerre l'autre partie, se les parties sunt ou conté de Triple, que il i eust terme de XL jors; en la maniere que il es desus devisé des XV jors, et le prince ou celui seroit en son leuc ne les voloit assambler dedens le dit terme, si comme il est desus devisé, nos et nostre covent somes tenus de constraindre le prince ou celui qui sera en son leuc en totes guises tant que il les ait assamblés dedens la quinzaine se il est el conté de Triple; et se il estoit hors del conté, que il les uest assamblés dedens XL jors sans aucun autre delay; et ce que les XIII ou la plus grant partie d'eaus conoistrent ou diront par esgart ou par jugement des devant dites requestes ou demandes se le prince ne le vout tenir ne acomplir, nos et nostre dit covent et nos successors somes tenus de constraindre ledit prince en totes manieres tant que il l'ait tenu et acompli / enterinement ce que il auront dit.

Et por ce que nos volons que totes ces choses, si com elles sont devisées totes ensamble et chascune par soi, soient tenues et mantenues fermes et estabkes, les V ans complis, lesquels V ans commencierent el mois de Mai prochain passé, et à greignor seurté dou fait, no avons fait faire cest present previlege par l'otroi et la volenté et le conseil de nostre dit covent, et l'avons fait seeler de nostre bole de plumb de la tube, ou la guarentie de nos freres, desquels ce sont les nons, c'est assavoir:

Frere Recelins de Fox;(12) Frere Jofroiz de Fox; Frere Amblarz; Frere Amfox Gomes, compaignon du maistre; Frere Martins Senechens; Frere Gilebert Alboin.

Ce fut fait l'an del incarnation nostre Seigneur Jhesu Crist M CC et LII, el mois d'Octobre.