1216.09.00.

Fridericus secundus divina favente clementia Romanorum rex semper augustus et rex Sicilie.

Decet reges et principes eam, quam susceperunt a domino, plenitudinem potestatis ecclesiis et locis venerabilibus tam grate quam diligentis cura provisionis adesse, ut potentie regalis communite presidio tam in se quam in rebus et tenementis eorum et quiete presentium et securitate in posterum glorientur. Attendentes igitur religiosam devotionem et assiduos labores militie Templi Jherosolomitani, quos incessanter perferunt contra inimicos Christi, et eos in corde nostro laudabiliter commendantes, dignum duximus et ydoneum petitionibus ipsorum facilem prebere assensum, ut eos in bono devotionis sue proposito gratia et virtute imperialis excellentie specialiter foveamus.

Eapropter cognoscat tam presens etas fidelium imperii quam successura posteritas, quod nos pro remedio anime nostre et successorum nostrorum omnes possessiones et omnia bona mobilia et immobilia Templi Jherosolomitani, que in imperio nostro legitime in presentiarum possident et in posterum iusto adeptionis titulo prestante domino sunt adepturi, una cum personis et subditis eorum in imperio nostro habitantibus et legationem atque negotia Templi Jherosolomitani exercentibus in protectionem imperatorie defensionis nostre suscepimus et [ut] sub tuitione maiestatis nostre gaudeant et prosperentur nec datam nec collectam nec exactionem aliquam nec iniustum aut extortum theloneum dare teneantur aut angariam sive perangariam sive aliquid honus cuiusquam publice functionis solvere debeant aut subire cogantur, eis indulgemus; statuentes et imperiali auctoritate sanccientes, ut nullus dux, nullus marchio, nullus comes, nulla civitas, nullum commune, nulla denique persona parva vel magna, secularis vel ecclesiastica, hanc protectionis et concessionis nostre paginam audeat violare nec aliquibns iniuriarum calumpniis seu dampnis attemptet infestare. Quod qui fecerit, imperiali auctoritate sanccimus, ut in ultionem transgressionis sue xl. libras auri puri pro pena componat, dimidium camere nostre et reliquum iniuriam passis.

Huius rei testes sunt Albertus Madeburgensis archiepiscopus, Eckihardus Mersburgensis episcopus, Tidericus marchio Misnensis et Orientis, comes Lodoycus de Wirtenberc, comes Hartemannus de Kyburc, comes Henricus de Lutrinburc, comes Gunterius de Swarzeburg(a), comes Henricus frater eins, Anselmus de Justingen imperii marescalcus, Henricus advocatus de Widas(b), Ricardus camerarius et alii quam plures.

Signum domini Friderici Romanoram regis semper augusti et regis Sicilie invictissimi (M).

Ego Conradus Metensis et Spirensis episcopus et imperialis aule cancellarius vice Siffridi Maguntine sedis archiepiscopi et tocius Germanie(c) archicancellarii recognovi.

Acta sunt hec anno dominice incarnationis millesimo ducentesimo sextodecimo, mense septembri, v. indictione, regnante domino Fr. dei gratia gloriosissimo Romanorum rege semper augusto et rege Sicilie, anno regni eius in imperio quarto et in Sicilia xviiii, feliciter. Amen.