1199.01.04.

De elemosinis et expulsione fratrum Templi ab ecclesiis parrochialibus.

Innocentius episcopus servus servorum Dei venerabilibus fratribus [...]

Dilecti filii nostri, fratres militie Templi, gravem proposuerunt in auditorio nostro querellam, quam pro sui magnitudine preterire sub silentio non valemus. Accepimus sane, quod quidam vestrum destructioni domus Templi, quod dolentes dicimus, intendentes post celebrationem concilii eos beneficio elemosinarum, quas fideles soliti sunt eis ad sustentationem suam et eorum, qui cum ipsis orientalem defendunt ecclesiam, pietatis intuitu erogare, pro sue voluntatis arbitrio privaverunt, litteras, quas pro eisdem elemosinis colligendis ipsis fratribus apostolica sedes indulsit, legere contempnentes et, quod gravius est, eos de parrochiis suis dehonestatos contumeliosis sermonibus expellentes.

Ex quo utique facto quanta jactura christianitati proveniat in partibus transmarinis, de facili quilibet potest intueri. Subtractis equidem elemosinis, de quibus arma et equitature predictis fratribus comparantur, fratres ipsi remanebunt inermes et in eos Sarraceni facilius prevalebunt. Quantum igitur saluti sue detrahat et fidei Christiane, qui sepedictos fratres contra sedis apostolice constitutionem infestat, nullus vel modicum discretus ignorat. Unde quoniam sustinere in patientia non debemus, ut quod jam dictis fratribus apostolica sedes indulsit, temeritate vel cupiditate cuiuslibet violetur, universitati vestre per apostolica scripta mandamus et districte precipiimus, quatinus eos, qui in colligendis elemosinis missi fuerint, in ecclesiis vestris recipientes parrochianos vestros ad eas conservandas sollicitis monitis et exhortationibus inducatis.

Si quis autem capellanus seu plebanus fratres ipsos de ecclesiis expulerit, ipsum auctoritate apostolica a divinorum celebratione suspendimus et jubemus per mensem pro tanto excessu manere suspensum.

Datum Lateran. 2 Non. Januarii, pontificatus nostri anno primo.