1160.09.14

De confratriis seu collectis.

Alexander episcopus s. s. d. fratribus archiepiscopis etc.

Si discrimina, que dilecti filii fratres militie templi pro defensione christianitatis continue sustinent in transmarinis partibus, et beneficia, que pauperibus subministrant, consideratione solicita pensaretis, non solum ab illorum cessaretis molestiis, sed et alios studeretis districtius cohibere.

Ceterum audivimus et audientes nequivimus non mirari, quod eos quidam vestrum solito durius persequentes non solum cartas [?] eorum dissimulant, sed ipsos gravibus injuriis vexaverunt et in damp- / {39} nabili adhuc proposito perseverantes litteras nostras generales et quandoque speciales ledere contempnentes, quas si legerint, interim vilipendunt et elemosinas et beneficia subtrahunt consueta, invasores quoque bonorum ipsorum fratrum non arguunt, sed in sua familiaritate recipiunt, fratres ipsos intolerabiliter deprimentes, quos pro sue religionis honestate deberent attentius sustinere.

Unde quoniam gravamen eorum tanto minus volumus patienter sustinere, quam gravius justo Dei iudicio permittente iugiter ipsos inimici christiani nominis persequuntur, universitati vestre per apostolica scripta mandamus et in obedientie virtute precipimus, quatenus litteras, quas pro eis dirigimus, sive generales fuerint sive etiam speciales, recipiatis humiliter et fideliter exponatis, subiectos vestros ad solitas elemosinas et beneticia sollicitis monitis et exhortationibus inducentes, fratres autem benigne recipiatis et honeste tractetis, attentius provisuri, ut de parochianis vestris vel de subditis aliis, si quae clam detulerint, ipsos ad exhibendam iusticiam omni gratia ac timore postpositis canonica severitate cogatis, ita quod fratres ipsi ex negligentia vestra ad sedem apostolicam non laborent, scituri quod si precepto nostre presumpseritis ultionis contraire, in vos sicut in inobedientes animadvertere severius compellemur.

Datum Anagnie 15. Kal. Octobris pontificatus anno nostri primo.