Stabilimenta Rhodiorum militum - Synopsis
based on the older manuscript tradition as well as on the French and Latin versions
© Jyri Hasecker, Hamburg / Jürgen Sarnowsky, Hamburg (2007/2022)
2084-Hospitality 9
--> French version
--> Latin version
Enacted by the chapter general at Rhodes 23 November, 1440.
BNCF Ms. Magl. cl. XXXII, 37, fol. 69r.
Quod infirmarius et scribanus sint presentes visitationi
Item statuimus et ordinamus, quod infirmarius et scribanus infirmarie semper debeant interesse visitationi, quam facient medici horis usitatis. Et dicti medici – non petendo nec accipiendo pro eorum servitio aliquid aliunde quam tantummodo suum salarium deputatum sub pena privationis – teneantur visitare cum magna gravitate et diligentia dominos infirmos et petere ab eis de eorum passione et quanto et quantum pertinet, tangere pulsum et alia membra, respicere (ac) urinas et permanere per spatium temporis cum matura deliberatione et facere scribi tantum quantum viderit esse neccessum. Et scribanus cum sacramento accepto in introitu sui offitii teneatur fideliter scribere, quantum erit ordinatum, et precipere, quod preparetur sine aliquo defectu. Et dictus scribanus mutatur de duobus annis in duos annos sicut infirmarius ad hoc, ut offitium predictum sit sine aliqua reprehensione et reprobatione exercitatum. Item quod dictus infirmarius associatus ab aliquo ex sua familia teneatur qualibet nocte post horam completorii et post horam matutinam visitare omnes dominos infirmos et consolari eos, auxiliari illis. Et dicti duo probi viri deputati in societate hospitalarii debeant petere in matutino, si nocte preterita fuerunt visitati et confortati, sicut dictum est. Et si reperiunt defectum, debeant monere dictum infirmarium ad faciendum debitum suum. Aliter, si facere non vellet, debeant providere de alio secundum formam et modum iam dictum. Et super omnia dictus infirmarius debeat providere de bono [pane] et bono vino, bonis carnibus et bonis pullis remittendo hoc bone visitationi hospitalerii et duorum deputatorum in sua societate.
Next Hospitality 10 | Back to the Contents