Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1408-Arrendationes 5
Conclusio stabilimentorum:
Frater Petrus Daubusson cardinalis et magister
v. Ratificatio et confirmatio preeminentiarum, dignitatum magistri, baiulivorum, priorum, castellani Emposte, linguarum et fratrum, quorumcunque graduum fuerint
[119r] Ad hoc capitulorum generalium ordinis nostri auctoritas antiqua pariter et moderna stabilimenta ususque et consuetudines certo ordine, modo et(a) forma renovanda decrevit et ordinavit, ut superflua, inconcinna et perplexa oblitterentur, evanescant, intereant ordoque ipsorum clarior, dilucidior ornatiorque reddatur. Scrupulis etiam conscientię(b), honori decorique et quieti religiosorum nostrorum consulatur(c). Nam propter stabilimentorum confusum(d) ordinem ob temporum, ob locorum, ob agendorum variam mutablitatem contingentem commilitonum nostrorum coetus inquietatur. Nec intendit nec vult nec ordinat(e) capitularis prudentissima deliberatio, ut per huiusmodi renovationem, editionem, compositionem superius explanatam aliquo modo, directe vel indirecte, in genere aut in specie dignitatibus et prerogativis alicuius, cuiuscunque gradus fuerit, derogetur et preiudicetur.
Nos igitur auctoritate capitulari fungentes et ipsi ordinationi firmiter inherentes sancimus, stabilimus, statuimus, ordinamus et expresse declaramus, quod huiusmodi renovatio, ordinatio et nova editio regule, stabilimentorum, consuetudinum et usuum ordinis nostri nullo pacto quovis quesito colore preiudicium, damnum, alterationem, mutationem, variationem, mutabilitatem generet aut generare seu afferre qualitercunque possit gradibus, ordinibus, sessionibus, presidentie, auctoritatibus, prerogativis, preeminentiis magistri, ecclesie, hospitalis seu infirmarie, thesauri, baiulivorum tam conventualium quam capitularium, priorum, castellani Emposte, octo linguarum, fratrum earum, cuiuscunque gradus fuerint, scilicet militum, capellanorum et servientium, ac prioratuum, etiam collationibus atque pactis, conventionibus et concordiis ratione dictarum collationum de gratia per linguas, prioratus aut castellania Emposte seu fratres earundem cum prioribus et castellano Emposte ordinis nostri factis et initis. Quinimmo dicte preeminentie, prerogative et pacta super dictis collationibus priorum et castellani Emposte facta sint et esse intelligantur atque remaneant realiter et cum effectu in eo statu et qualitate, robore, vigore, quo erant ante huiusmodi renovationem et novam editionem ordinatam sub hac expressa restitutione et intentione, ut predictis propterea nullum generetur preiudicium.(f)
(b) Venice 1495, Ulm 1496, Salamanca 1534; Ms. consientie.
(c) Salamanca 1534; Ms., Ulm 1496, Venice 1495 consultatur.
(d) Salamanca 1534; Ms., Ulm 1496, Venice 1495 consensum.
(e) Venice 1495, Ulm 1496, Salamanca 1534; Ms. ordinatur.
(f) In Ulm 1496 follows Guillelmus Caoursin Rhodiorum vicecancellarius manu propria signavit.
Next Stabilimenta1493-Index | Back to the Contents