Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1368-Collationes 4
Frater Deodatus de Gozono magister
iiii. Quod prior significet magistro et conventui Rhodi preceptorias vacantes ultra mare. Aliter privetur collatione preceptoriarum pro illo anno
Dolos et fraudes in preceptoriarum collatione vitare cupientes sancimus atque statuimus, quod priores et castellanus Emposte anno quolibet post festum sancti Ioannis Baptiste de mense Iunii et revoluto tunc anno integro de preceptoriis vacantibus in suo prioratu castellaniaque Emposte et partibus occiduis per suas litteras autentice, particulariter et nominatim cum diligentia et celeriter magistrum et conventum Rhodi certiores efficiant. Nec de aliquibus preceptoriis in vim suarum preeminentiarum providere possint, quousque magister et conventus pro veteri consuetudine et secundum stabilimenta ac eorum preeminentias de preceptoriis ipsius anni collationem fecerint, et de tali provisione priores notitiam et responsum autenticum a magistro et conventu ipso habuerint, quo habito et non ante secundum suam preeminentiam de residuis vero preceptoriis eiusdem anni disponant et non aliter. Si autem huic institutioni priores contrafecerint, eo ipso collationes per eos facte nulle censeantur. Et nihilominus pro illo anno collationibus suis privantur. Et preceptorie ipse ad magistri et conventus dispositiones devolvuntur.
Next Collationes 5 | Back to the Contents