Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1341-Fratres 68
Consuetudo
lxviii(a). De modo castigandi
Si frater alium fratrem reprehendere voluerit et obiurgare, primo eum debet monere solus. Secundo alium debet adhibere fratrem secum. Tertio id facere debet in presentia duorum vel trium fratrum, et si delinquens perseveraverit, revelet baiulivo vel superiori. Et si frater accusaverit fratrem, antequam ipsum monuerit, ut supra dicitur, et plancta de eo facta fuerit, accusator incurrat illam poenam, quam delinquens incurrisset, intellecto tamen, si frater accusatus de accusatore clamorem fecerit. Et si aliquis frater accusaverit alium fratrem in presentia alicuius fratris aut personarum secularium preter dictum ordinem, sive probaverit sive non delictum accusati, quod patiatur eam poenam et similem, quam accusatus pati debet.
Next Fratres 69 | Back to the Contents