Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1249-Baiulivi 47
Consuetudo
xlvii. De linguarum et baiulivorum ac priorum numero et origine
Quamvis nostra religio ab sue originis institutione, quum rerum amplitudinem comparasset, consiliarios quosdam titulis dignitatum [82v] ornatos magistro adsistentes haberet, necessarium tamen visum est succedente tempore linguas et provincias distinguere et partiri, baiulivos ampliare, priores instituere, ut suis limitibus ac dicionibus religiosi coartati quietius professioni et regimini intenderent. Hinc secuta est olim et pro temporum succedentium opportunitate linguarum octo distinctio baiulivorum conventualium, qui linguis pręessent, ampliatio ac priorum institutio, qui provinciis presiderent, additique sunt quidam tituli, qui baiulivi capitulares dicuntur, qui capitulis ascripti sunt consilioque intersunt. Quorum annumeratio hec est:
- lingue Provincie: magnus preceptor, prior sancti Egidii, prior Tolose, baiulivus capitularis Monastę, qui sedente in magistratu fratre Iacobo de Milly magistro est institutus;
- lingue Alvernie: manescallus, prior Alvernię, baiulivus capitularis de Lureil, qui sedente in magistratu fratre Baptista de Ursinis magistro ordinatus est;
- lingue Francie: hospitalarius, prior Francie, prior Aquitanie, prior Campanie, baiulivus capitularis Moreę iamdudum institutus, baiulivus capitularis thesaurarius generalis, qui in magistratu sedente fratre Ioanne de Lastico ordinatus existit;
- lingue Italie: admiratus, prior urbis, prior Lombardie, prior Venetiarum, prior Pisarum, prior Baroli, prior Messanę, prior Capue, baiulivi capitulares sancte Euphemie, sancti Stephani prope Monopolim, sancte Trinitatis de Venusio, sancti Ioannis de Neapoli iamdudum instituti;
- lingue Aragonie, Cathalonie et Navarre: draperius, castellanus Emposte, prior Cathalonie, prior Navarre, baiulivi capitulares Maioricarum, qui sedente in magistratu fratre Antonio Fluviani, et de Casp, qui(a) sedente in magistratu fratre Baptista de Ursinis instituti fuerunt;
- lingue Anglie: turcupulerius, prior Anglie, prior Hibernie, baiulivus capitularis Aquilę
- lingue Alamanie: magnus baiulivus, prior Alamanię, prior Boemię, prior Hongarie, prior Dacie, baiulivus capitularis de Brandenburgh;
- lingue Castelle, Legionis et Portugalie: cancellarius, prior Castelle et Legionis, prior Portugalie;
capitulares autem baiulivi prior ecclesie ordinis, preceptor Cypri et preceptor Langonis communes sunt omnibus linguis;
baiulivus vero capitularis [83r] Nigropontis communis est duabus linguis Aragonię et Castelle ex concordia inter eos habita.(b)
(b) In Ulm 1496 follows a woodcut with the inscription Priores.